სამშენებლო კომპანია „სვეტი“ დიდუბეში საცხოვრებელ კომპლექსს მშენებლობის ნებართვის გარეშე აშენებდა, რის გამოც მშენებლობა თბილისის მერიის ზედამხედველობის სამსახურმა შეაჩერა. კიდევ ერთ ობიექტზე მშენებლობის შეჩერების მიზეზი დარღვეული პროექტი გახდა. ამჟამად „სვეტის“ ოფისში ხმაურია. მომხმარებლები, რომელთაც მშენებარე ბინებში ფული აქვთ გადახდილი კომპანიის ადმინისტრაციას ედავებიან. 

 მირცხულავას ქუჩაზე მშენებარე ობიექტის გაყიდვების მენეჯერი ადასტურებს, რომ კომპანიას პრობლემები აქვს. თუმცა მშენებლობის ნებართვის გარეშე დაწყებაში პრობლემას ვერ ხედავს და აცხადებენ, რომ მშენებლობის ნებართვას მოგვიანებით აიღებენ, რის შემდეგაც მშენებლობა გაგრძელდება. 

  უძრავი ქონების სააგენტო Myclient.ge გამოეხმაურა. კომპანიის დირექტორის, გვანცა გუჯელაშვილის თქმით, უძრავი ქონების შეძენას ბევრი რისკი ახლავს თან და  მოქალაქეებმა ყველა დეტალი უნდა გაითვალისწინონ, რათა თანმდევი საფრთხეებისგან თავი დაიზღვიონ.

 „ბოლო პერიოდში სამშენებლო კომპანიებთან დაკავშირებით არაერთი რეგულაციის გატარება გახდა საჭირო. მართალია, მშენებლობის ნებართვა ამჯერად კომპანია „სვეტს“ შეუჩერდა, თუმცა, სამწუხაროდ, დღეს ბევრი სამშენებლოა მსგავსი რისკის ზღვარზე. მოქალაქეებმა, რომლებიც უძრავი ქონების შეძენას გეგმავენ, აუცილებლად უნდა გათვალონ ყველა თანმდევი რისკი. რთულია, დამოუკიდებლად გაარკვიო რამდენად სანდოა ესა თუ ის კომპანია, აქვს თუ არა რაიმე პრობლემა იმ უძრავ ქონებას, რომლის ყიდვასაც აპირებენ და ა.შ. სწორედ ამიტომ, ჩვენი რეკომენდაცია იქნებოდა, რომ მოქალაქეებმა სწორი გადაწყვეტილების მიღებაში დაიხმარონ სპეციალისტები- ადამიანები, რომლებიც უკეთ არიან ამ სფეროში ჩახედულნი და რომლებიც უფრო კვალიფიციურ ინფორმაციას მიაწვდიან მათთვის საინტერესო საკითხზე,“- განაცხადა გვანცა გუჯელაშვილმა.

შეგახსენებთ, რომ სამშენებლო კომპანია „სვეტი“  თბილისში რამდენიმე პროექტს ახორციელებს. ესენია ნაძალადევში, ჭყონდიდელის ქუჩაზე მიმდინარე მშენებლობა - „სვეტი ქალაქი 1“- 1200 ბინიანი კომპლექსი, დიდუბეში, წერეთლის 27 ნომერში- 17 სართულიანი „წერეთლის კოშკის“ მშენებლობა, ასევე დიდუბეში მირცხულავას ქუჩაზე 15 სართულიანი კომპლექსი, "სვეტი ქალაქი 3“ ნუცუბიძეზე და „სვეტი ისანი“ კაიროს ქუჩაზე, პირველ შემთხვევაში კომპლექსი 15 სართულიანია, მეორეში კი 10 სართულიანი.