„ქართული ოცნება – დემოკრატიული საქართველოს“ თბილისის მერობის კანდიდატმა, კახა კალაძემ საზოგადოებას, პროგრამული ხედვის ფარგლებში, სატრანსპორტო პოლიტიკა და მისი ძირითადი მიმართულებები წარუდგინა. პროგრამაში მოხვდა მარშალ გელოვანის გამზირიდან სამტრედიის ქუჩაზე გამავალ ე.წ. დაკიდულ ხიდი, რომლის განხორციელებაზე „ქართულმა ოცნებამ 2013 წლის თებერვალში უარი განაცხადა. მოგვიანებით გაირკვა, რომ პროექტი აუცილებლად განხორციელდება.

როგორც ცნობილია, ე.წ. დაკიდულ ხიდთან დაკავშირებით თბილისის მერიასა და რეგიონული განვითარებისა და ინფრასტრუქტურის სამინისტროს შორის დაპირისპირება 2013 წლის დასაწყისში მოხდა. თებერვალში მუნიციპალური განვითარების ფონდმა ამ პროექტის განხორციელებაზე უარი თქვა. როგორც მაშინ ფონდში განმარტავდნენ, „შესაბამისი კვლევების ჩატარების საფუძველზე დადგინდა, რომ თბილისში, მარშალ გელოვანის ქუჩისა და სამტრედიის ქუჩის დამაკავშირებელი ე.წ. დაკიდული ხიდი (პროექტი საერთო ბიუჯეტით-80 მლნ ლარი) აღარ აიგება. საკითხის საფუძვლანი შესწავლის შედეგად დადგინდა, რომ მარჯვენა და მარცხენა სანაპიროების დამაკავშირებელი ხიდის აგებით ტერიტორიაზე არსებული საცობების მასშტაბები კიდევ უფრო გაიზრდება. ამასთან, ხიდის აგებას სამტრედიის ქუჩების მაცხოვრებლები ეწინააღმდეგებიან. - ამის შესახებ განცხადება ფონდმა 2013 წლის 18 თებერვალს გააკეთა.

ფონდის ამ გადაწყვეტილებას თბილისის მაშინდელი მერი გიგი უგულავა გამოეხმაურა და განაცხადა, რომ თბილისელებს უგულავას პოლიტიკური შეხედულებების გამო სჯიან.

„ქალაქში საცობების შექმნის მოტივით ხიდის აშენებაზე უარის თქმა სასაცილოა, რადგან „ვეფხისა და მოყმის ძეგლის მიმდებარე ტერიტორია მძიმე სატრანსპორტო კვანძია და იქ სამანქანო ხიდის აგება აუცილებელია. აღნიშნულ სამანქანო ხიდზე ვაშლიჯვრიდან მომავალი ტრასის დაერთებაც იქნება შესაძლებელი, რაც გაგარინის მონაკვეთსა და ჟვანიას მოედანს განტვირთავს, - განაცხადა მაშინ უგულავამ.

უგულავას საპასუხოდ კი ინფრასტრუქტურის მინისტრის ყოფილმა მოადგილემ, შოთა მურღულიამ ასეთი განცხადება გააკეთა: „სამინისტროს შესაბამისმა სამსახურებმა განიხილეს არსებული პროექტი და მისი ძვირი ღირებულების (პროექტი აზიის განვითარების ბანკისა და საქართველოს ბიუჯეტის ერთობლივი დაფინანსებით უნდა გახორციელებულიყო და მისი ღირებულება 80 მლნ ლარი გახლდათ), დიდი საექსპლუატაციო ხარჯების (5 მლნ ლარი წელიწადში) და მოსახლეობისათვის მიყენებული ზიანის საფუძველზე, აღნიშნული ხიდის მშენებლობაზე უარი განაცხადეს. სამინისტრო და მუნიციპალური განვითარების ფონდი მზად არიან, განახორციელონ მდინარე მტკავრზე ხიდის მშენებლობა, თუ მერია წარმოადგენს პროექტის ალტერნატიულ, მოსახლეობასთან შეთანხმებულ ვარიანტს.

თითქმის 4-წლიანი პაუზის შემდეგ კი ირკვევა, რომ ე.წ. დაკიდული ხიდი აუცილებლად აშენდება. როგორც 2016 წლის დეკემბერში თბილისის მერის მოადგილემ ირაკლი ლექვინაძე „კომერსანტთან საუბრისას განაცხადა, ვეფხი და მოყმის ძეგლიდან სამტრედიის ქუჩაზე გამავალი ხიდი მშენებლობასთან დაკავშირებით დონორთან აქტიური კონსულტაციები იმართება.

„ქალაქის სურვილია, რომ ამ ხიდის პროექტი განხორციელდეს. ჩვენ გვაქვს კომუნიკაცია და ურთიერთობა დონორთან. ამ ხიდის პროექტის განხორციელებას აპირებდა აზიის განვითარების ბანკი, ჩვენ ამჯერად მათთან კომუნიკაცია გავააქტიურეთ. ახლა საუბარია იმაზე, რომ მოხდეს თვითონ ხიდის პროექტის კორექტირება , - განუცხადა მაშინ „კომერსანტს ლექვინაძემ.

წყარო: კომერსანტი