ე.წ ელიავას ბაზრობის ადმინისტრაცია ბაზრობის ადგილას მწვანე კონცეფციის სავაჭრო მოლად გადაქცევის პროექტზე მუშაობს. პროექტის ავტორთა თქმით, პროექტის მიხედვით, თანამედროვე სტანდარტების მწვანე კონცეფციის სავაჭრო გასართობი მოლი 5 ჰექტარ ფართობზე უნდა გაშენდეს და იგი რეგიონული მასშტაბის იქნება.

 80 მილიონი ლარის პროექტზე ახალგაზრდა პროფესიონალთა გუნდი უკვე მუშაობს. ახალი სავაჭრო გასართობი მოლის ერთ-ერთი მთავარი პრიორიტეტი გამწვანებაა. პროექტში გაწერილია ეგზოტიკური ხეების მუზეუმის და რამდენიმე ორანჟერიის მოწყობა. ელიავა რეგიონული მოლის პროექტის ფარგლებში იგეგმება მასშტაბური ავტოპარკინგის მოწყობა, რომელიც საწყის ეტაპზე 2500 ავტომანქანას მოემსახურება. 

პროექტის ავტორები აცხადებენ, რომ ელიავას ტერიტორიაზე ინფრასტრუქტურული სამუშაოების ნაწილი უკვე დაწყებულია. მათი თქმით, 2011 წლიდან ადმინისტრაციას ტერიტორიის კეთილმოწყობისთვის დახარჯული აქვს 10 მილიონამდე ლარი. ელიავას ბაზრობიდან სახელმწიფო ბიუჯეტში 200-დან 250 მილიონ ლარამდე შედის. ახალი პროექტის განხორციელების შემდეგ კი ეს თანხა მნიშვნელოვნად გაიზრდება.

  ელიავას ბაზრობის თანამედროვე მოლად გადაქცევის პროექტი აქვს ადმინისტრაციის მეორე ნაწილსაც. როგორც კომპანია „ანჯის“ ხელმძღვანელი, გია ანდრიაძე აცხადებს, მათი პროექტიც ჯერ განხილვის სტადიაზეა და მისი განხორციელება მერიის გადაწყვეტილებაზეა დამოკიდებული.
იხ.ვიდეო
წყარო