კახა კალაძე სამშენებლო ადგილებზე სატვირთო მანქანების გასარეცხი ადგილების გამოყოფას ითხოვს. თბილისის მერის განცხადებით, სატვირთო ავტომობილები, რომლებიც სხვადასხვა მშენებლობებს ემსახურებიან, ქალაქს აბინძურებენ.

„ხშირად არის შემთხვევა, როდესაც სატვირთო მანქანები შედიან სამშენებლო მოედანზე და მთელ ქუჩებს აბინძურებენ. სრული კატასტროფა ხდება ამ მიმართულებით და მე მინდა, ვთხოვო ზედამხედველობას და არქიტექტურის სამსახურს, რომ არცერთი ნებართვა არ უნდა იყოს გაცემული თუკი სამშენებლო ადგილებზე არ მოეწყობა ადგილი, სადაც მანქანების ჩამორეცხვა იქნება შესაძლებელი.  ცენტრალურ ქუჩებზე ეს ნაგავი არ უნდა გამოიტანონ,“-განაცხადა კალაძემ.

 დედაქალაქის მერის განცხადებას სამშენებლო კომპანიებიც გამოეხმაურნენ. 

სამშენებლო კომპანია „ივერიონის“ ხელმძღვანელი არჩილ ჯაყელის განცხადებით, დიდი მშენებლობისთვის ეს პრობლემა არ იქნება, მაგრამ მცირე ტიპის სამშენებლო ფირმებისთვის სირთულეებთან იქნება დაკავშირებული.

ბიზნესმენი აცხადებს, რომ „მცირე მშენებლობებზე საკმარისი ადგილიც არ არსებობს სამრეცხაო ზონისთვის“.

სამშენებლო კომპანია „GDG“-ის ხელმძღვანელი ბეჟან წაქაძე კი აცხადებს, რომ მათ სამრეცხაო ადგილები ისედაც მოწყობილი აქვთ, მით უმეტეს, როდესაც ცენტრალურ გზაზე გამოდის. „ცენტრალურ გზაზე გამოსვლამდე მანქანებს წმენდენ და რეცხავენ საბურავებს; სპეციალური ადგილის მოწყობას სამრეცხაოსთვის განსაკუთრებული თანხები არ სჭირდება და ეს კომპანიებისთვის ტვირთი ვერ იქნება,“-განაცხადა წაქაძემ. 

წყარო: Busines Media Georgia