სახელმწიფო ქონების ეროვნული სააგენტოს ინფორმაციით, ბიზნესსახლის მშენებლობაზე ტენდერი ახლიდან გამოცხადდება.   მათი ინფორმაციით, ახალ ტენდერს, მთავრობის განკარგულებით, მუნიციპალური განვითარების ფონდი გამოაცხადებს.

„მოგახსენებთ, რომ საქართველოს მთავრობის განკარგულების საფუძველზე, თბილისში, ბიზნეს სახლის მშენებლობასთან დაკავშირებულ ელექტრონულ ტენდერს დაუყონებლივ გამოაცხადებს საქართველოს რეგიონული განვითარებისა და ინფრასტრუქტურის სამინისტროს სისტემაში შემავალი უწყება - საქართველოს მუნიციპალური განვითარების ფონდი. ასევე, მთავრობის გადაწყვეტილებით, შპს მომსახურების ბიუროს დაევალა ბიზნეს სახლის მშენებლობასთან დაკავშირებული უკვე გამოცხადებული ტენდერის შეწყვეტა, თუმცა წინადადებების მიღება დამთავრდა 19 დეკემბერს და ვინაიდან კომპანიების მხრიდან დაფიქსირებული არ იყო დაინტერესება, ტენდერი გამოცხადდა არშემდგარად. გაცნობებთ, რომ ბიზნეს სახლის მშენებლობასთან დაკავშირებული პროცესი მიმდინარეობს აბსოლუტურად შეუფერხებლად და გამჭვირვალედ. ყველა იმ კომპანიას, რომელსაც სათანადო გამოცდილება აქვს მსგავსი ფუნქციური დანიშნულების ობიექტის ასაშენებლად, შექმნილი აქვს ღია და კონკურენტული პირობები,“- ნათქვამია განცხადებაში.

71.6 მილიონიანი ტენდერი სახელმწიფო ქონების ეროვნულმა სააგენტომ ნოემბრის ბოლოს გამოაცხადა, თუმცა იგი არ შედგა. რატომ მოხდა უკვე გამოცხადებული ტენდერის შეწყვეტა და მუნიციპალური ფონდისთვის გადაბარება, სააგენტოში ამის შესახებ ინფორმაციას არ ფლობენ.

შეგახსენებთ, რომ ზემოხსენებული პროექტი 600-ზე მეტ სახელმწიფო სერვისს ბიზნესი ერთ ჭერქვეშ, ერთი ფანჯრის პრინციპით მიიღებას ითვალისწინებს. როგორც პროექტის ავტორები განმარტავდნენ, ბიზნესსახლი სახელმწიფოსა და ბიზნესს შორის თანამშრომლობის სრულიად ახლებურ მოდელს წარმოადგენს, რომელიც ბიზნესისა და იურიდიული პირებისთვის, სხვადასხვა სამინისტროსა თუ სახელმწიფო უწყებაში გაფანტული სერვისების ერთ სივრცესა და ერთიან ელექტრონულ პლატფორმაზე მიწოდებას ითვალისწინებს. მათ შორისაა სახელმწიფო ქონების მართვისა და პრივატიზაციის სერვისები, ბუნებრივი რესურსების ლიცენზიები, მშენებლობის ნებართვები, ენერგეტიკული პროექტები, სოფლის მეურნეობის დახმარების სახელმწიფო პროგრამები, პროგრამა აწარმოე საქართველოში, რომელთან დაკავშირებულ სერვისებს ბიზნესს მეწარმეობის განვითარების სააგენტო აწვდის, საპარტნიორო ფონდის სერვისები და ა.შ. ჯამში, საუბარია 600-ზე მეტ მომსახურებაზე, რომელსაც ბიზნესი დღეს სახელმწიფოს მხრიდან იყენებს და ყველა მათგანი ერთ სივრცეში იქნება ხელმისაწვდომი.

წყარო:bm.ge