მისაღები ოთახი ოჯახის წევრების ერთად შეკრების, სტუმრების მიღების, დასვენების და განტვირთვის ფუნქციებს ითავსებს, ამიტომ ერთიორად მნიშვნელოვანია მის მოწყობას წინ დაფიქრება,  დაგეგმვა, ანალიზი და სხვადასხვა ვარიანტების განხილვა უძღვოდეს. გარემო, რომელსაც შევქმნით უნდა იყოს, რა თქმა უნდა, კომფორტული, გემოვნებიანი და ფუნქციონალური. როდესაც მისაღები ოთახის მოწყობაზეა საუბარი ყველანაირი შაბლონი უნდა დაივიწყოთ და საკუთარ გემოვნებას და ინსტინქტებს მიენდოთ, რა თქმა უნდა, სურვილის შემთხვევაში დაიხმარეთ ინტერიერის დიზაინერის რჩევები, რომლებსაც თქვენი სურვილების შესაბამისად მოგაწვდით. აუცილებლად მიიღეთ მონაწილეობა ინტერიერის დაგეგმვაში, სწორედ ეს ოთახი იქნება  თქვენი ორიგინალურობის და ინდივიდუალურობის ხაზგამსმელი.

 

- წინასწარ განსაზღვრეთ როგორი სტილის გინდა იყოს თქვენი მისაღები ოთახი, სტილს შეუსაბამეთ ფერების კომბინაცია, ჩამოყალიბდით  როგორი კედლები გინდათ- ორნამენტებიანი „შპალერი“ თუ სადად შეღებილი ( გაითვალისწინეთ, რომ სადა კედლები მისი სხვადასხვა აქსესუარებით გაფორმების მეტ საშუალებას მოგცემთ, ვიდრე ორნამენტებიანი, თანაც, სადა კედლებმა არ იცის მობეზრება, მაგრამ თუ  მაინც და მაინც მოგბეზრდათ ადვილია მისი გადაღებვა და სხვადასხვა დეტალის დამატება. თქვენ მიერ არჩეული ორნამენტები კი, შესაძლოა, მომავალ წელს უკვე აღარ იყოს ტრენდული და თქვენი მოწონებაც  დაკარგოს) კედელს შეუსაბამეთ იატაკი, ორივეს ერთად კი ავეჯი. კარგი იქნება, თუ ყველაფერს წინასწარ დაგეგმავთ, ასე საქმეს გაუადვილებთ საკუთარ თავსაც და თქვენს ინტერიერზე მომუშავე ადამიანებსაც. თუ თქვენი სივრცე პატარაა, ეცადეთ უპირატესობა ღია ფერებს მიანიჭოთ, ამით თქვენ მეტი სივრცის ილუზიას შექმნით. მე უპირატესობას პასტელურ ფერებს ვანიჭებ.

 

- საქმეს ყველა ჭერის კეთებით იწყებს. თქვენ შეგიძლიათ შექმნათ სადა ჭერი ან დაყოთ დონეებად, გააჩნია რის შესაძლებლობას მოგცემთ თქვენი ჭერის სიმაღლე, იმისათვის რომ ოთახი უფრო ნათელი და დიდი გამოჩნდეს, სასურველია, ჭერი ღია ფერებში შეიღებოს.

 

- სასურველია, თუ მისაღებ ოთახს ექნება ფანჯრები, მე უპირატესობას ვიტრაჟს ვანიჭებ. ამით ოთახს ემატება სივრცე და სინათლე. დღის განათების გარდა მნიშვნელოვანია ღამის განათებაც, ამიტომ დაკვირვებით შეარჩიეთ, როგორი განათება გსურთ, ხშირ შემთხვევაში, ერთი, ცენტრალური განათება არ არის საკმარისი სიმყუდროვის შესაქმნელად, ამიტომ ეცადეთ ოთახს შემატოთ კედლის ბრები ან სანათები, რომლებსაც საჭიროების შემთხვევაში გამოიყენებთ.

 

- როდესაც ჭერის  კედლების, იატაკის და განათების „პრობლემა“ გადაიჭრება დროა ოთახის ავეჯით მოწყობაზე იზრუნოთ. გაითვალისწინეთ, არ გადატვირთოთ ოთახი გამოუყენებელი ავეჯით, ამით სიმყუდროვე ირღვევა და თვალიც იღლება. თუ თქვენი მისაღები პატარა ზომისაა, ეცადეთ „ფეხებიანი“ ავეჯი შეიძინოთ, ამით მეტ სივრცეს მისცემთ თქვენს ოთახს.

 

-თქვენი გადასაწყვეტია, როგორი სტილის იქნება მისაღები- კლასიკური თუ თანამედროვე, მთავარია თქვენი ავეჯი კომპოზიციურად ერწყმოდეს ოთახს.

 

- უპირატესობა მიანიჭეთ სწორკუთხა ზედაპირის მქონე  თანამედროვე დიზაინის ავეჯს, ისინი თვალს არ ღლიან და თქვენს ოთახს დახვეწილ და გემოვნებიან იარეს შესძენენ.

 

- შესაძლებელია სტილის შერევაც, მაგრამ ეს უნდა იყოს უშეცდომო და კომპოზიციურად გამართლებული.

 

- დიდი ყურადღება დაუთმეთ ფარდების შერჩევასაც, ის თქვენს მისაღებს სიმყუდროვეს შესძენს, ეცადეთ ფარდის საკიდი ჭერზე განათავსოთ, ამით მაღალი ჭერის ილუზიას შექმნით.

 

- ტელევიზორი არ დადგათ ფანჯრის პირდაპირ, ან იმ კედელთან, სადაც ფანჯარა გაქვთ, ამ დროს სინათლე აირეკლება და ჩვენება ფუჭდება,  უმჯობესია თუ ფანჯარა ტელევიზორის კედლიდან მარჯვნივ ან მარცხნივ იქნება.

 

- არ გადატვირთოთ ოთახი ბევრი სავარძლით, თუ თქვენ ბევრ სტუმარს ერთად იღებთ, უმჯობესია ორი დივანი დადგათ ერთმანეთის პირისპირ და შექმნათ მოსასვენებელი და განსატვირთი სივრცე მეგობრებისთვის.

 

- მისაღებს უხდება ბუხარი.

 

- სურვილის შემთხვევაში კედელზე თქვენი სურათების განთავსებაც შეგიძლიათ, გარკვეული წყობის დაცვით,  ამით ცოცხალ იერს შესძენთ მისაღებ ოთახს.

 

- ურიგო არ იქნება რამდენიმე  თაროს  გაკეთებაც, იქ ორიგინალურ და საინტერესო ნივთებს განალაგებთ.

 

 

თუ თქვენი მისაღების მოწყობაში დიდ ენერგიას და ფანტაზიას ჩადებთ, თუ ეცდებით რომ შექმნათ გემოვნებიანი, დახვეწილი და მყუდრო გარემო, ფერების,  ავეჯისა და აქსესუარების ერთმანეთთან  კომპოზიციურად შერწყმის ხარჯზე, დამერწმუნეთ, ეს ოთახი თქვენთვის, თქვენი ოჯახისთვის და მეგობრებისთვის დასვენების, გართობის და რელაქსაციის საუკეთესო  ადგილი გახდება.