ბოლო ერთი თვის განმავლობაში უსაფრთხოების ნორმების, უკანონო და პროექტის დარღვევით მშენებლობებისთვის დედაქალაქის ზედამხედველობის სამსახურმა 216 მითითება გასცა. აღნიშნულთან დაკავშირებით განცხადება თბილისის მერმა დღეს გამართულ მთავრობის სხდომაზე გააკეთა.

 კახა კალაძემ ყურადღება უკანონო მშენებლობებისა და სამშენებლო ნორმების გამკაცრების საკითხზეც გაამახვილა.  მისი თქმით, ქალაქში ფიქსირდება უამრავი უკანონო მშენებლობის ფაქტი, რომელთა მესაკუთრეებს ზედამხედველობის სამსახურმა გარკვეული ვადა მისცა, რათა უკანონო შენობა-ნაგებობების დემონტაჟი განხორციელდეს.

  „რაც შეეხება სახელმწიფო მიწაზე უნებართვო მშენებლობებ, მიზანმიმართულად ხდება მიწების დატაცება. დაახლოებით, 500-მდე ასეთი ობიექტია გამოვლენილი და ამათგან წარმოება დაწყებულია 270 ობიექტზე,“- განაცხადა კახა კალაძემ.

 მისივე თქმით, სამშენებლო მოედნიდან გამოსული მანქანებისთვის უნდა მოეწყოს სპეციალური მოსარეცხი ადგილები იმისთვის, რომ მანქანებმა ქალაქი არ დააბინძურონ.

 „შესაბამისად, არცერთი სამშენებლო ნებართვა არ უნდა გაიცეს, სადაც ასეთი ჩამოსარეცხი არ იქნება მოწყობილი იმ მშენებლობებზე, სადაც მშენებლობა უკვე დაწყებულია. დაავალდებულეთ, რომ ეს მოედნები შესაბამისად მოეწყოს. ეს ქალაქი ყველასია და ყველამ უნდა ვიზრუნოთ მის სისუფთავესა და მოვლაზე,“-განაცხადა დედაქალაქის მერმა.