ბოლო დროს ხშირად გვესმის ტერმინი- ბლოკჩეინი, ბევრი საუბრობს მის უპირატესობებზე, ბევრმა კი არ იცის რაში მდგომარეობს მისი არსი, მნიშვნელობა და დანიშნულება.

ბლოკჩეინი  დეცენტრალიზებული და დამოუკიდებლად მართვადი მონაცემთა ბაზაა, ის დაცულია, როგორც კიბერშეტევებისგან, ისე ფიზიკური განადგურებისგან. მასში არსებული ჩანაწერები ინახება არა ერთ კონკრეტულ ადგილას, არამედ მთელს მსოფლიოში არსებულ ათი ათასობით კომპიუტერში.

ამბობენ, რომ ეს რევოლუციური სისტემა დიდ  გავლენას იქონიებს უამრავ ინდუსტრიაზე. ფიქრობენ, რომ ის მსოფლიო კომერციას არსებითად შეცვლის. მისი უპირატესობა მის დაცულობაში და გარეშე ჩარევების არარსებობაში მდგომარეობს. ერთ კონკრეტულ მონაცემში უკანონო მანიპულაციის ნებისმიერი მცდელობისას ქსელის ყველა კომპიუტერი საეჭვო მოქმედებას ავტომატურად ბლოკავს. ბლოკჩეინის ტექნოლოგიაში მონაცემები ბლოკების სახით უწყვეტ ჯაჭვს ქმნის, თითოეული ბლოკი შეიცავს ინფორმაციას ტრანზაქციების შესახებ. ბაზაში არსებული ჩანაწერების წაშლა, შეცვლა და გადაწერა შეუძლებელია. ამ ინოვაციური ტექნოლოგიის მომავალი საქართველოსაც უკავშირდება. გორსა და გლდანში 20 და 40 მეგავატის სიმძლავრის დატაცენტრები ააშენა კომპანია Bitfury-მა.  ამ კომპანიამ საქმიანობა 2011 წელს დაიწყო როგორც „მაინერმა“ ფირმამ, თუმცა თანდათან სრულად ინტეგრირებულ ბლოკჩეინ-ტექნოლოგიის კომპანიად გარდაიქმნა. დროთა განმავლობაში მან უზრუნველყო ისეთი მოწყობილობებისა და პროგრამული უზრუნველყოფების შექმნა, რომლებმაც განავითარეს ბლოკჩეინი სისწრაფისა და უსაფრთხოების მიმართულებით.

ამჟამად კომპანიის საქმიანობა მოიცავს ბიტკოინ- ტრანზაქციების პროცესინგს, ბლოკჩეინის ანალიტიკას, უახლესი თაობის 16-ნანომეტრიანი ჩიპების წარმოებას და საკუთრების უფლების რეგისტრაციას ბლოკჩეინის გამოყენებით, რაშიც კომპანიას ერთ-ერთმა პირველმა მხარი საქართველომ აუბა.

იხ.ვიდეო