ახალი წელი ახლოვდება და წლის კულმინაციას თან ერთვის წინასადღესასწაულო ფაცი-ფუცი, მზადება და ფიქრი იმაზე, თუ როგორ შევქმნათ ჩვენს ოჯახში ჯადოსნური აურა.

ამბობენ, რომ ჩვენი ცხოვრების წარმართვა, ახალი წლის ღამის განწყობებზეა დამოკიდებული. ისე გაგრძელდება, როგორც დაიწყება. ამიტომ, მნიშვნელოვანია შევქმნათ გარემო, სადაც თავს ვიგრძნობთ კომფორტულად და  ბედნიერად, გარემო, სადაც ჩამოვიტოვებთ ყველაფერ ცუდს და  ამაღლებული განწყობით შევხვდები ახალ წელს. გარემოს შექმნაში კი უდიდესი წვლილი სახლის საახალწლოდ მორთვას მიუძღვის, ასე რომ არ დაიზაროთ, არ აქვს მნიშვნელობა სახლში პატარა ბავშვები გყავთ თუ არა, ახალი წელი ხომ თითოეული ჩვენგანის დღესასწაულია.

- ნაძვის ხის მორთვა ოჯახის წევრების ერთად შეკრების კარგი მიზეზია. აუცილებელია, რომ ოჯახის თითოეულმა წევრმა თანაბრად მიიღოს მის მორთვაში მონაწილეობა, სწორედ ამ დროს იქმნება უხილავი, აბსტრაქტული, ბედნიერების ქსელი, რომელიც ახალი წლის თანამდევია.
 

- ნაძვის ხის შერჩევისას მეტი ყურადღება დაუთმეთ მის მოცულობას და არა სიმაღლეს, მოცულობითი ნაძვის ხე მეტად ეფექტურია. რა თქმა უნდა მოცულობასთან ერთად სიმაღლეც თუ ექნება შეგვიძლია ჩავთვალოთ, რომ იდეალური ნაძვის ხე შევიძინეთ.( ჩვენი რეალობისთვის მსგავსი ტიპის ნაძვის ხე საკმაოდ ძვირი სიამოვნებაა.  სამწუხაროდ,  საბოლოოდ მაინც ყველაფერს ფინანსებამდე მივყავართ) ბევრს ბუნებრივი ნაძვის ხე მოსწონს, მაგრამ ამ დროს იფიქრეთ იმაზე, რომ თქვენი ბედნიერებისთვის ცოცხალ ნაძვს რაღაც ნაწილი აკლდება, ახლა კი ის დროა, როცა მწვანე საფარი ჰაერივით გვჭირდება.
 

- საგულდაგულოდ გაუშალეთ ნაძვის ხეს ტოტები, ეს მას გაახშირებს და გაალამაზებს. ნაძვის მორთვას სანათების დამაგრებით ვიწყებთ, ზოგს ვერტიკალურად დაშვებული ნათურები მოსწონს, ზოგს ჰორიზონტალურად დახვეული, მთავარია სანათი ერთი ფერის იყოს, ეს ნაძვის ხეს მეტად დახვეწილ და გემოვნებიან იერს მისცემს.
 

- შემდგომი ეტაპი ბაფთების და ყვავილების დამაგრებაა, ისინი  სიმეტრიულად განათავსეთ  ნაძვის ხეზე, ეს გაგიადვილებთ სათამაშოების დაკიდების პროცესსაც. ბაფთების შემდეგ დიდი ზომის სათამაშოებს ჩამოვკიდებთ, ვეცადოთ, რომ მათაც სიმეტრიული წყობა მივცეთ. დიდი სათამაშოების შემდეგ, შედარებით პატარები დავამაგროთ და ასე მიყოლებით.
 

- ზოგს ერთ ფერში გადაწყვეტილი ნაძვის ხე მოსწონს, ზოგი ორ ფერს ურევს ერთმანეთში, ან ორი ფერით სიმეტრიულად კვეთს ნაძვის ხის ზედა და ქვედა ნაწილს. პირობითად ავიღოთ წითელი და თეთრი ფერი. ნაძვის ხის ზემოთა ნაწილს თეთრად რთავენ, ქვემოთა ნაწილს კი წითლად.
 

- წელს ტრენდულია  ექსტრავაგანტული და უჩვეულო ფორმის ნაძვის ხეები მოსართავებად კი გირჩები,  ხელოვნური რტოები და სხვადასხვა ფორმისა და სახეობის სათამაშოები. 
 

- თეთრად დათოვლილ ნაძვის ხეს უხდება პასტელური ფერების მოსართავები, მაგალითად სიცფერის და ბეჟის კომპოზიციური ნაზავი.
 

- ბოლო პერიოდში აქტიურად იყენებენ ხელნაკეთ აქსესუარებს და თუ თქვენ გაქვთ დრო, სურვილი და წარმოსახვის უნარი, საკუთარი ხელით შექმენით ნაძვის ხის და სახლის მოსართავები.
 

- ნაძვის ხეს ქვემოთ დაუწყეთ სასაჩუქრედ შეფუთული ბუტაფორული  ყუთები. 
 

- გარდა ნაძვის ხის მორთვისა შექმენით საახალწლო კუთხე, სადაც განათავსებთ საახალწლო აქსესუარებს, ეს კუთხეც მორთეთ სანათებით.
 

- საახალწლო ნათურებით გაანათეთ ფანჯრებიც, ეს ყველა ოთახში შექმნის საახალწლო განწყობას და სიმყუდროვეს, ამ შემთხვევაშიც უპირატესობა ერთი ფერის სანათს მიანიჭეთ, მე, მაგალითად საძინებლის ფანჯარა თეთრი სანათით მაქვს გაფორმებული, ამან სიმყუდროვე და ამაღლებული განწყობა შემატა ოთახს.
 

- თუ გაქვთ დიდი სარკე ისიც მორთეთ ილუმინაციით, ეს განათების ორმაგ ეფექტს გვაძლევს.
 

- სამზარეულოს კარედების ქვემოთ ერთ ხაზად გაატარეთ ნათურები, აქ ფერადიც „დასაშვებია“, ასე კერძების მზადებაც სახალისო გახდება.
 

- დაბოლოს კარზე დაამაგრეთ ნაძვის ხის ტოტისგან შეკრული წრე, რომელსაც გირჩებით, ფერადი ტოტებით და სურვილის შემთხვევაში ტკვბილეულით მორთავთ, ასე დასაწყისშივე შეუქმნით მოსულ სტუმარს საახალწლო განწყობას.

მრავალი ბედნიერი ახალი წელი თქვენ და თქვენს ოჯახებს!