საძინებელი ოთახი ადამიანის პირად სივრცეს წარმოადგენს, ამიტომ მის მოწყობას დიდი ყურადღება და გათვლა სჭირდება. იმისთვის რომ ბედნიერებმა დაიძინოთ და გაიღვიძოთ ოთახი აუცილებლად უნდა იყოს მყუდრო, გემოვნებით მოწყობილი, დახვეწილი და რა თქმა უნდა ფუნქციურად სწორად გადანაწილებული. აუცილებლად შეადგინეთ გეგმა, განიხილეთ ვარიანტები, განსაზღვრეთ სტილი, ფერი და საჭიროების შემთხვევაში დაიხმარეთ ინტერიერის დიზაინერი. მნიშვნელოვანი გადაწყვეტილებები თავად მიიღეთ, გახსოვდეთ, რომ საქმე თქვენს პირად სივრცეს ეხება.

• სანამ სარემონტო სამუშაოებს დაიწყებდეთ წინასწარ გათვალეთ როგორი იქნება თქვენი ავეჯი, ეს დაგეხმარებათ ოთახის ფერები სწორად და გემოვნებით შეუსაბამოთ თქვენთვის სასურველ ავეჯს და ნივთებს.
   
• ფანჯრები, ეს ერთ-ერთი მთავარი დეტალია საძინებელი ოთახისათვის, თუ თქვენი ფანჯარა გეპატარავებათ, ან ოთახის ზომისათვის შეუსაბამოდ მიგჩნიათ, აუცილებლად გაადიდეთ, დიდი ფანჯრები მეტი სინათლის წყაროა, და თუ თქვენს საძინებელს აივანიც აქვს, უპირატესობა ვიტრაჟს მიანიჭეთ.
   
• საძინებლის ჭერი ბევრი ადამიანის საიდუმლოებებს და ოცნებებს ინახავს, როდესაც წვები, ზემოთ იყურები და ფიქრობ, ამიტომ დიდი ყურადღება დაუთმეთ ჭერის დიზაინს.  თავიდანვე განსაზღვრეთ დონეებად დაყოფილი ჭერი გირჩევნიათ თუ კლასიკური, მხოლოდ ერთი დონის. ამის შემდეგ ჭერის ფერზე იფიქრეთ, მე უპირატესობას თეთრი ფერის ჭერს ვანიჭებ, ის ნებისმიერი ფერის კედელს მიესადაგება და ასევე სიმაღლის და სივრცის ილუზიას ქმნის.
   
• ამის შემდეგ განათებაზე იფიქრეთ, ზოგი ჭერში ჩამონტაჟებულ განათებას ანიჭებს უპირატესობას, ზოგს კი ჩვეულებრივი სანათი ურჩევნია. საძინებლის განათება ძალიან მნიშვნელოვანია, სწორედ ის ქმნის ოთახში ინტიმურ გარემოს, ამიტომ აუცილებელია საწოლის ბრების, ან დასადგამი სანათების შეძენაც, რათა თავად აკონტროლოთ განათების ხარისხი.
   
• შემდეგი ეტაპია კედელი, განსაზღვრეთ შპალერი გსურთ თუ მის შეღებვას აპირებთ, იქნებ შერეული ვარიანტი გირჩევნიათ, ამას არ აქვს მნიშვნელობა, მთავარია ფერები. ეცადეთ კედელი პასტელურ ფერებში გადაწტვიტოთ, ეს ოთახში სითბოს და სიმყუდროვეს შემოიტანს. ბევრი საწოლის უკანა კედელს განსხვავებულ ფერში ღებავს, ან განსხვავებულ შპალერს აკეთებს, ზოგს საყვარელი მხატვრის ტილო ურჩევნია კედელზე გადაიტანოს, ეს თქვენს გემოვნებაზეა დამოკიდებული.
   
• იატაკი კედლის ფერს შეუსაბამეთ, რა თქმა უნდა, ესეც წინასწარ უნდა გქონდეთ განსაზღვრული.
   
• როდესაც ოთახის სარემონტო სამუშაოებს დაასრულებთ, დროა ავეჯით მოაწყოთ.ზოგს ძველებური სტილის საძინებლები მოსწონს, საწოლის, საძინებლის კარადის და ე.წ „კომოდის“ მოჩუქურთმებული თავები, ზოგი თანამედროვე, სწორკუთხა ფორმებს ანიჭებს უპირატესობას, მთავარი ისევ და ისევ ავეჯის და ოთახის ინტერიერის კომპოზიციური შერწყმაა. თუ ოთახის ზომა საშუალებას გაძლევთ უპირატესობა „ოთახ გარდერობს“ მიანიჭეთ, ასე დიდი ფართი გექნებათ საკუთარი ტანისამოსისთვის და ოთახსაც არ გადატვირთავთ დიდი ზომის კარადით.
   
• საძინებლის მნიშვნელოვანი დეტალია ფარდა, სწორედ ის ქმნის სიმყუდროვეს, ეცადეთ ფარდის ფერი საწოლის გადასაფარებელს ან თეთრეულს შეუსაბამოთ, რა თქმა უნდა კედლის ფერიც გასათვალისწინებელია ფარდის არჩევის დროს.
   
• დაბოლოს, გემოვნებით და ესთეტიკურად მოწყობილი ოთახი, თქვენს ინდივიდუალიზმს და უნიკალურობას გაუსვამს ხაზს.