სამზარეულო ის ადგილია, სადაც დიასახლისთა უმეტესობა ყველაზე დიდ და „ნაყოფიერ“ დროს ატარებს, სწორედ აქ ქმნიან და აგემოვნებენ კულინარიულ შედევრებს. გასტრონომიული სურვილების ასრულების ამ ჯადოსნური ოთახის მოწყობა მეტად  საპასუხისმგებლო და მნიშვნელოვანი პროცესია, მინიმალურ დეტალსაც უდიდესი ყურადღება უნდა დაეთმოს, ამისათვის ყველაფერი წინასწარ უნდა დაიგეგმოს, განისაზღვროს და ბიუჯეტი გაიწეროს. ყველაზე მთავარი კი ის არის რომ, თქვენ მიერ შეძენილი პროდუქცია ხარისხიანი და  უსაფრთხო იყოს, რა თქმა უნდა, დიდი ყურადღება უნდა დაეთმოს მის ესთეტიკურ და ფუნქციონალურ მხარესაც. სამზარეულოში თავი კომფორტულად და მოხერხებულად უნდა იგრძნოთ. მაშ ასე, სამზარეულოს მოწყობის საფეხურები დეტალურად გავიაროთ:

 

 

- ერთ-ერთი მთავარი და სასიცოცხლოდ მნიშვნელოვანი დეტალი ფანჯრის არსებობაა, „სამზარეულო უფანჯროდ იგივეა, რაც კერძი უმარილოდ“. სამზარეულოს მუდმივი განიავება სჭირდება, მოგეხსენებათ იქ  ორთქლი და საჭმლის სუნი ტრიალებს, იმისათვის რომ ათასმა სუნმა არ დაიბუდოს თქვენს ავეჯში და კედლებში და ასევე სხვა ოთახებშიც არ გამოაღწიოს ფანჯარა მუდმივად ღია უნდა გქონდეთ.

 

 

- სამზარეულოში, ძირითადად, ე.წ „შეკიდულ ჭერს“ აკეთებენ, ის ადვილად იწმინდება და ორთქლის კვალიც ნაკლებად რჩება, აუცილებელია, რომ თქვენ მიერ შერჩეული მასალა იყოს ხარისხიანი და გამოიყურებოდეს ესთეტიკურად, შეგიძლიათ ჭერის ფერი სამზარეულოს კარადების ფერს, ან მის რომელიმე დეტალს შეუსაბამოთ.

 

 

- სამზარეულოსთვის ერთ-ერთი მნიშვნელოვანი დეტალი განათებაა, განსაკუთრებით სამუშაო ზონაში, ეცადეთ გონივრულად გადაანაწილოთ განათება, ასევე  ჩაამონტაჟეთ დამატებითი სანათები, რომლებსაც სურვილის შემთხვევაში გამოიყენებთ.

 

 

- რაც შეეხება სამზარეულოს კედელს, თქვენ შეგიძლიათ ის შეღებოთ ან გამოიყენოთ ისეთი შპალერი, რომელიც ადვილად იწმინდება. სამზარეულოს სამუშაო ზონას რაც შეეხება, ის, აუცილებლად კერამიკული ფილებით, ან მინით დაფარეთ, მათი გაწმენდა მეტად ადვილია, ზოგი ერთჯერად მისაკრობ ქაღალდსაც ხმარობს გაზქურასთან ახლოს.

 

 

- მნიშვნელოვანია თუ როგორ იატაკს გამოიყენებთ სამზარეულოში, ზოგი შეცდომას უშვებს და ლამინირებულ იატაკს აგებს, მსგავსი ტიპის იატაკები მოუხერხებელია სამზარეულოში, მოგეხსენებათ ლამინირებული იატაკი წყლის დასხმის შემდეგ, შესაძლოა, ამოიბურცოს, ხის იატაკი კი წყლით იჟღინთება, მათი წმენდა საკმაოდ მოუხერხებელია, სამზარეულოს იატაკი კი მუდმივად ისვრება და მუდმივ წმენდას მოითხოვს. იატაკის მოსაპირკეთებლად უნიკალური საშუალებაა კერამიკული ფილა, ის ადვილად იწმინდება მაგრამ აუცილებელია რომ ის იყოს კარგი ხარისხის, რადგან უხარისხო ფილები მძიმე საგნის დაცემას ვერ უძლებს და დროთა განმავლობაში იბზარება. კერამიკული ფილა უსაფრთხოების თვალსაზრისითაც ხელსაყრელია, ის არ არის აალებადი, ხის  და ლამინირებული იატაკისგან განსხვავებით. მოგეხსენებათ, რომ უსაფრთხოება ყველაფერზე მნიშვნელოვანია. თუ მაინც და მაინც მსგავსი ტიპის იატაკები მოგწონთ, სამუშაო ზონა მოაპირკეთეთ კერამიკული ფილებით და დარჩენილ სივრცეში დააგეთ ხის ან ლამინირებული იატაკი.

 

 

- სამზარეულოს ავეჯის შერჩევა მეტად საპასუხისმგებლო პროცესია, ის უნდა იყოს უსაფრთხო, ცეცხლგამძლე და ეკოლოგიურად სუფთა, რაც მთავარია შიდა და გარე თაროები, ასვე უჯრები ფუნქციონალურად უნდა იყოს განაწილებული, თქვენ მაქსიმალურად უნდა გაგიადვილდეთ მათი მოხმარება და ნივთების განთავსება. არ გირჩევთ ბევრ ღია თაროს და მათზე აქსესუარების განთავსებას, თქვენ მათი მუდმივი წმენდა მოგიწევთ. უმჯობესია, თუ სამზარეულოს კარადების ქვეშ სიცარიელე იქნება, ასე თქვენ ადვილად გამოწმენდთ იატაკს.

 

 

- ზოგს ერთი ფერის ავეჯი მოსწონს, ზოგს ორი ფერის კომპოზიციური შერწყმა ურჩევნია, ზოგი კი ფერად კარადებს ანიჭებს უპირატესობას, მთავარია რომ თქვენ თავი კომფორტულად იგრძნოთ.

 

 

- კარადებში ჩაშენებული ტექნიკა მეტად მოსახერხებელია, ის სამზარეულოს ზედმეტი გადატვირთვისგან იცავს.

 

 

- სამზარეულოს აუცილებელი დეტალი კარგი ხარისხის გამწოვია.

 

 

- გირჩევთ, რომ ნიჟარა ფანჯარასთან დაამონტაჟოთ, ასე თქვენ გაიხალისებთ ჭურჭლის რეცხვის რუტინულ და მომაბეზრებელ პროცესს.