უძრავი ქონების სააგენტოების ერთი ნაწილი 2017 წლის შეჯამების დროს გასულ წელს აქტიურად აფასებს, მეორე ნაწილი კი აცხადებს, რომ ლარის მერყეობის გამო მომხმარებელი ბინის შესყიდვის გადაწყვეტილებას რთულად იღებს. უძრავი ქონების ტენდენციებსა და მოლოდინებზე "საქმის კურსთან" სამშენებლო კომპანია ’’GDG პლუსის“ ხელმძღვანელმა ბეჟან წაქაძემ ისაუბრა. 

-ბატონო ბეჟან, ლარის კურსის მერყეობა 2017 წლის ტენდენციის ძირითად ხაზად თუ დარჩა გაყიდვების მიმართულებით? 

- 2017 წელს უკანასკნელ ორ თვეს თუ არ ჩავთვლით, ლარის კურსი თებერვლიდან მოყოლებული სტაბილური იყო და ამ პერიოდში მოსახლეობაში განცდა გაჩნდა, რომ ლარი სტაბილურია, რაც ერთ-ერთი ძირითადი პირობაა ბინების რეალიზაციისთვის. როდესაც ლარი მერყეობს, მოსახლეობა მოლოდინის რეჟიმშია და ეროვნული ვალუტის დასტაბილურებას ელოდება. იპოთეკური სესხებიც 100 ათასი ლარზე მაღლა ძირითადად აშშ დოლარში გაიცემა და ძირითად სეგმენტს სესხის აღება აშშ ვალუტაში უწევს. ვფიქრობ, რომ თუ რეალიზაციას გადავხედავთ, 2017 წელს გასულ წელთან შედარებით გაზრდილია. ფასები ყველა რაიონში და უბანში არ შემცირებულა. ძირითადად ფასების კლება ქალაქის გარე უბნებში შეიმჩნევა, რადგან იქ მიწოდება მოთხოვნაზე გაცილებით მეტია. ცენტრალურ უბნებსა და განსაკუთრებით, ისტორიულ ზონებში, ფასმა აიწია. 

-ფასების კუთხით 2018 წელს როგორია თქვენი მოლოდინი? 

-ჩვენ ძირითადად ქალაქის ისტორიულ და ცენტრალურ უბნებში ვოპერირებთ და ჩემი აზრით, იქ უძრავი ქონება კიდევ უფრო გაძვირდება გამომდინარე იქიდან, რომ ასეთი ადგილები ცოტაა. 

-როგორ ფიქრობთ, მშენებლობის შესახებ უსაფრთხოების ახალი ტექნიკური რეგლამენტი, რომელიც უკვე ძალაში შევიდა გარკვეულწილად ფასების ზრდას გამოიწვევს? 

-თავისთავად გამოიწვევს, თუმცა არ მგონია, რომ ეს ძალიან დიდი პროცენტი იყოს, რადგან ახალი რეგულაციებით უკვე სახანძრო სისტემისთვის ორი კიბის უჯრედი იქნება საჭირო, რაც სარეალიზაციო ფართს ამცირებს და ამავე დროს თვითღირებულება მცირედით დაახლოებით 2-დან 3%-მდე გაიზრდება. დეველოპერმა და მომხმარებელმაც ფასი უსაფრთხოებაში უნდა გადაიხადოს.

წყარო: bm.ge