თბილისის არქიტექტურის სამსახურის უფროსის თემურ ბოლოთაშვილის ინფორმაციით, ადგილობრივი და უცხოელი ექსპერტების ჩართულობით, დედაქალაქის მიწათსარგებლობის გენერალურ გეგმასთან დაკავშირებით, პირველი, მოთელვითი ხასიათის შეხვედრა უკვე შედგა.

მისივე თქმით, თემატური შეხვედრა უახლოეს მომავალში გაიმართება.

არქიტექტურის სამსახურის უფროსი ამ წუთებში თბილისის საკრებულოს ფრაქცია "ნაციონალური მოძრაობის" დეპუტატებს ხვდება, სადაც გენგეგმასთან დაკავშირებულ საკითხებს განიხილავენ.

"საკრებულოს დეპუტატებთან ვაპირებ ვისაუბრო იმ პროცესზე, რაც მიმდინარეობს მიწათსარგებლობის გენერალურ გეგმასთან დაკავშირებით, რა ნაწილებია დასასრულებელი იმისთვის, რომ მოხდეს წარმოდენილი დოკუმენტის სრულყოფა. ნებისმიერ შეკითხვას ვუპასუხებ, რაც გენგეგმასთან დაკავშირებით დაისმება. მერიას შენიშვნები აქვს ზონირების ნაწილთან, განხორციელების ეტაპებთან დაკავშირებით. დოკუმენტის შეფასების პროცესში ჩართულები არიან საერთაშორისო და ადგილობრივი ექსპერტები. როგორც კი შეფასდება ამ პირების მიერ დოკუმენტი, მოხდება მისი საჯაროდ გამოქვეყნებაც. ამ ეტაპზე ხდება დოკუმენტის სრულყოფილი შესწავლა. ასევე მოხდება დოკუმენტის შეფასება 45-დღიანი ვადის გასვლის შემდეგ, რაც გენგეგმის ჯგუფს "სითი ინსტიტუტ საქართველოს" დოკუმენტის სრულყოფისთვის აქვს მიცემული.

პირველი, მოთელვითი ხასიათის შეხვედრა უკვე შედგა. თემატური შეხვედრა უახლოეს მომავალში გაიმართება,"- განაცხადა ბოლოთაშვილმა. 

ცნობისთვის, დედაქალაქის მიწათსარგებლობის გენერალურ გეგმა 6 ეტაპისგან შედგება. 5 ეტაპი მერიას მიღებული აქვს. მე-6 დასკვნით ეტაპზე შენიშვნების გამო დოკუმენტის მიღება ჯერჯერობით ვერ მოხერხდა. მერიას შენიშვნები აქვს ზონირების ცვლილების, ტრანსპორტისა და გზათა ქსელის განვითარებასთან დაკავშირებით. 

გენგეგმაზე მომუშავე ჯგუფს "სითი ინსტიტუტ საქართველოს" დოკუმენტის სრულყოფისთვის 45-დღიანი ვადა აქვს მიცემული. გენგეგმაზე მუშაობა 2015 წელს დაიწყო და დოკუმენტის შესაქმნელად 2 800 000 ლარი გამოიყო.

წყარო: ipn.ge