ვისაც ბავშვებთან გაქვთ შეხება დამერწმუნებით, რომ მათ თავიანთი საკუთარი სივრცე სჭირდებათ დასაძინებლად, სათამაშოდ, სამეცადინოდ თუ შემოქმედებითი იდეების განსახორციელებლად.

 

ბევრი მშობელი ბავშვის დაბადებამდე ფიქრობს თუ როგორ მოაწყოს ან სად განათავსოს ბავშვის ოთახი, როგორი მასალა გამოიყენოს, რა ფერები შეარჩიოს, როგორი ავეჯი დადგას და სხვ. ამ ყველაფრის ზუსტად განსაზღვრა კი ძალიან მნიშვნელოვანია ბავშვის ფიზიკური თუ გონებრივი განვითარებისთვის.

 

ბავშვის ოთახი აუცილებლად უნდა იყოს-ბუნევრივი, ნათელი, კომფორტული, ფუნქციონალური და გემოვნებიანი.

 

-შეეცადეთ ბავშვის ოთახი სახლის მზიან მხარეს განათავსოთ, ბავშვისთვის აუცილებელია D ვიტამინი. მზის აბაზანა კი ნამდვილი საბადოა, განსაკუთრებით ახალდაბადებული ბავშვისთვის.

 

-სამშენებლო და მოსაპირკეთებელი მასალა აუცილებლად უნდა იყოს ჯანსაღი და ნაკლებქიმიური, კედლები დაფარეთ ნესტსაწინააღმდეგო ხსნარით. ეცადეთ, რომ იატაკი ბუნებრივი ხის მასალით იყოს დამზადებული, რადგან ბავშვები მასზე დიდ დროს ატარებენ.

 

-რაც შეეხება ფერებს, ის უნდა იყოს თბილი და არაგამაღიზიანებელი, ეცადეთ მკვეთრად და დომინანტურად არ გამოიყენოთ სქესთან დაკავშირებული „შაბლონური“ ფერები, როგორებიცაა-ვარდისფერი და ცისფერი.

 

-ავეჯი, რა თქმა უნდა იყოს ბუნებრივი ხის მასალის, რომელსაც მომრგვალებული ფორმები ექნება. ნუ გადატვირთავთ ოთახს დიდი ზომის ავეჯით, საწყის ეტაპზე პატარას ტანისამოსი „კომოდშიც“ მშვენივრად ეტევა.

 

-ტექსტილიც, რა თქმა უნდა, ბუნებრივი მასალის უნდა იყოს. ხელოვნურ ხალიჩებში მტვერი უფრო ადვილად და ღრმად იბუდებს. ასე ხდება ფარდის შემთხვევაშიც.

 

-ეცადეთ ბავშვს სათამაშო კუთხე მოუწყოთ, გაუკეთოთ ხის სათავსო, რომელშიც თავის სათამაშოებს შეინახავს, შესაძლებელია სათავსოს ზედაპირი დაარბილოთ და ე.წ „პუფადაც“ გამოიყენოთ.

 

-კედელზე სურათების კუთხის მოწყობაც შეგიძლიათ, ეს ოთახს ბუნებრივ და ცოცხალ იერს შესძენს.

 

-ბავშვის ოთახი დილა-საღამოს აუცილებლად უნდა განიავდეს და სველი წესით გაიწმინდოს!