საფრთხის შემცველ სამშენებლო პროდუქციას ბაზრიდან ამოიღებენ - ამას ითვალისწინებს ეკონომიკის სამინისტროს მიერ მომზადებული კანონპროექტი, რომელიც პროდუქციის უსაფრთხოებისა და თავისუფალი მოძრაობის კოდექსში ცვლილებების შეტანას გულისხმობს.  კანონპროექტი გულისხმობს ეტაპობრივად სხვადასხვა პროდუქციის მოცვას, მათ შორის სათამაშოების, სამოქალაქო დაცვის ფეთქებადი საშუალებების, მანქანა- დანადგარების მიმართულებით და ა.შ. კანონის შემუშავებას საქართველოს ევროკავშირთან ასოცირების ხელშეკრულება ავალდებულებს და ევროპულ კანონთან დაახლოება 2022 წლამდე სრულად უნდა მოხდეს. 

კანონპროექტი გულისხმობს 3 ღონისძიების გატარებას იმ შემთხვევაში, თუ პროდუქცია საფრთხის შემცველია: 

1- პროდუქციის რეალიზაციიდან ამოღება იმ დრომდე, სანამ არ მოხდება პროდუქციის ტექნიკური შეუსაბამობის აღმოფხვრა. 

2- ბიზნესოპერატორის მიერ პროდუქციის რეალიზაციიდან გამოთხოვა - თუ დადგინდა, რომ პროდუქცია საფრთხის შემცველია, ბიზნესოპერატორს ეძლევა გაფრთხილება. კონკრეტული პერიოდის შემდეგ კი ხდება პროდუქციის ფარული შესყიდვა და თუ აღმოჩნდა, რომ პროდუქცია კვლავ არ შეესაბამება სტანდარტებს, პროდუქციის რეალიზაცია ჩერდება. 

3- თუ პროდუქცია სერიოზული საფრთხის შემცველია, ხდება ბაზრიდან მისი ამოღება.

უძრავი ქონების სააგენტო Myclient.ge ცალსახად დადებითად აფასებს კანონპროექტს და თვლის, რომ საფრთხის შემცველი სამშენებლო პროდუქციის ბაზრიდან ამოღება, ასევე მშენებლობებზე რეგულაციების და კონტროლის გამკაცრება, უსაფრთხოების და ხარისხის ნორმების მუდმივი მონიტორინგი საერთო ჯამში დადებით შედეგს მოგვცემს. მოსახლეობაშიც გაიზრდება ნდობა სამშენებლო კომპანიებისა და მშენებლობების მიმართ. ბაზარზე დამკვიდრდება ხარისხიანი და ეკოლოგიურად სუფთა პროდუქციის მოხმარების ტენდენცია, რაც ისევ და ისევ მოსახლეობის კეთილდღეობას მოხმარდება.