ბოლო პერიოდში მედიაში აქტიურად განიხილება, რომ საკანონმდებლო რეგულაციები, რომელთა გატარებაც სამშენებლო სექტორის მიმართებით იგეგმება, ბიზნესზე უარყოფითად აისახება. კერძოდ, ექსპერტები ვარაუდობენ, რომ რეგულაციების გამკაცება სამშენებლო კომპანიებს ხარჯებს გაუზრდის, რაც ავტომატურად აისახება უძრავი ქონების ფასებზე.

 „მენაშენთა ასოციაციის“ ერთ-ერთი წარმომადგენლის განცხადებით,  „რეგულაციებისა და სანქციების გამკაცრება მენაშენეებისთვის 30 ათასიდან 50 ათას ლარამდე დამატებით ხარჯს გამოიწვევს, რაც უძრავი ქონების ფასში ნამდვილად აისახება. ფასის გაძვირების გარეშე შედეგებს ვერ მივაღწევთ და ყველა ვთანხმდებით, რომ ეს რეგულაციები არის სწორი. წლის ბოლომდე ფასის ცვლილება ძირითადად სახანძრო უსაფრთხოების მოთხოვნებიდან გამომდინარე მოხდება, რაც 1 კვადრატულ მეტრზე ფასის 80-100 დოლარით ზრდას გამოიწვევს, თუმცა, ეს ამით არ  გაჩერდება“.

 საკითხს, უძრავი ქონების სავარაუდო გაძვირებასთან დაკავშირებით, უძრავი ქონების სააგენტო Myclient.ge-ც გამოეხმაურა.

 რეგულაციების გამკაცრების შემდეგ უძრავ ქონებაზე ფასების ზრდას ვარაუდობს კომპანიის დირექტორი გვანცა გუჯელაშვილიც. მისი თქმით, „რეგულაციების გამკაცრება ბევრად მეტი ნებართვის მიღებასთან და მშენებლობის ხარისხის გაუმჯობესებასთან იქნება დაკავშირებული. შესაბამისად, მშენებლებს, რომლებსაც მათ დაცვას უკვე კანონი დაავალდებულებს, სამშენებლო სამუშაოების თვითღირებულება შედარებით მეტი დაუჯდებათ, ეს კი ავტომატურად უძრავი ქონების ფასზეც იმოქმედებს“.

 კომპანიაში მიაჩნიათ, რომ უძრავი ქონების  ამ მიზეზით გაძვირება საგანგაშო არ არის, რადგან ის საკითხები, რომელთა მოგვარებასაც ისახავ მიზნად რეგულაციების გამკაცრება, ბევრად მნიშვნელოვანია.

 „მაშინ, როცა საქმე ეხება ადამიანის სიცოცხლის უფლების დაცვას, როცა პრობლემაა სამშენებლო მასალების ხარისხზე და იმაზე, თუ რამდენად სამართლებრივად განხორციელდა ესა თუ ის მშენებლობა, ყველა ვთანხმდებით, რომ თითოეული ზემოჩამოთვლილი ფასების გაძვირებაზე მნიშვნელოვანია. უმჯობესია, უძრავი ქონება, რომელსაც შევიძენთ, შედარებით მეტი გადავიხადოთ, ოღონდ გვქონდეს გარანტია, რომ არის ხარისხიანი და მისი მშენებლობა კანონის ყველა წესით განხორციელდა,“-განაცხადა გვანცა გუჯელაშვილმა.

შეგახსენებთ, რომ „მშენებლობის ნებართვის გაცემის წესისა და სანებართვო პირობების შესახებ“ დადგენილებაში ცვლილებები უკვე შევიდა. ცვლილებების შედეგად, ნებართვის მიღების პროცესშივე იქნება აუცილებელი გამწვანების გეგმის წარმოდგენა, იქ არსებული ხეების აღრიცხვა და გამწვანების ახალი გეგმის წარდგენა.  

 ასევე, 4000 კვ/მ-ზე დიდი ნაგებობის მშენებლობის ნებართვის მისაღებად დეველოპერებს საწყის ეტაპზევე დასჭირდებათ სატრანსპორტო კვლევისა და სატრანსპორტო რეგულირების სქემის წარმოდგენა. 

ამასთან, დეველოპერს ვალდებული იქნება განათავსოს საინფორმაციო დაფა, რომელიც უნდა მოიცავდეს სამშენებლო ობიექტზე გამწვანების პროექტის ძირითადი ასპექტებისა და პარამეტრების ამსახველ ინფორმაციას. მათ შორის, გამწვანების პროექტის შეთანხმების თარიღს; გასაშენებელი მწვანე ნარგავების სახეობას 

(მათ შორის, დახასიათება − ხნოვანება, სიმაღლე); გამწვანების პროექტის დასრულების თარიღს; შეთანხმებულ გამწვანების პროექტს, რომელიც უნდა იყოს ვიზუალურად გამოსახული მაკეტი ან/და ფოტომონტაჟი.

მთავრობის დადგენილების თანახმად, რეგულაციები 22 თებერვლიდან ამოქმედდება.