საქართველოს სტატისტიკის ეროვნული სამსახურის ინფორმაციით, გასულ წელს, საქართველოს მასშტაბით მშენებლობის 10 495 ნებართვა გაიცა, რაც ჯამში 6 494 768 კვ.მ ფართობია. აქედან, ყველაზე მეტი 5 032 ნებართვა თბილისის მერიის არქიტექტურის სამსახურმა გასცა, რაც იმას ნიშნავს, რომ მომდევნო წლებში 3 301 705 კვ.მ-ის მშენებლობა განხორციელდება.  
 დედაქალაქს მშენებლობის ტემპით მნიშვნელოვნად ჩამოუვარდება რეგიონები. კერძოდ,  2017 წლის განმავლობაში ქვემო ქართლში სულ 1 325 მშენებლობის ნებარვა გაიცა (324 189 კვ.მ), 1 141 ნებართვა გაიცა (1 835 697 კვ.მ.) აჭარაში,სამეგრელო-ზემო სვანეთში - 637 (176 385 კვ.მ.),  იმერეთში - 630 (322 036კვ.მ.), კახეთში - 481 (119 925 კვ.მ.), მცხეთა-მთიანეთში - 398 (111 030 კვ.მ.), შიდა ქართლში - 370 (157 882 კვ.მ.), სამცხე-ჯავახეთში - 304 (98 120 კვ.მ.), გურიაში - 125 (37 282 კვ.მ.), ყველაზე ცოტა, 52 -(10 517კვ.მ.) ნებართვა კი რაჭა-ლეჩხუმი და ქვემო სვანეთში გაიცა.
 

 საქსტატის ინფორმაციის თანახმად, 2017 წელს გაცემული ნებართვების რაოდენობა 2016-თან შედარებით 5%-ით არის შემცირებული.  მართალია, სამშენებლო ნებართვების რაოდენობა 2016 წელთან შედარებით, 2017-ში შემცირდა, თუმცა აქ საგულისხმოა ის ფაქტი, რომ მთელს ქვეყანაში გაცემული ნებართვების თითქმის ნახევარი  დედაქალაქზე მოდის.
 

 ის, რომ დედაქალაქი მშენებლობების რიცხვით ყოველთვის გამორჩეულია, უცხო არ არის.  

თუმცა, ექსპერტების შეფასებით, ეს ტენდენცია  ქვეყანაში არსებულ სხვადასხვა პრობლემის სიმწვავეზე მეტყველებს. უძრავი ქონების სააგენტოს დირექტორს, გვანცა გუჯელაშვილს მიაჩნია, რომ დედაქალაქში მშენებლობების რიცხვის მომატება მძიმე სოციალურ-ეკონომიკური ფონით არის გამოწვეული.

  „ქვეყანაში უმუშევრობის ძალიან დიდი მაჩვენებელია, ამიტომ, მოქალაქეები, იმისთვის, რომ ეკონომიკურად უზრუნველყოფილები იყვნენ, ცდილობენ, ცხოვრება იქ დაიწყონ, სადაც უფრო მეტი სამუშაო ადგილი ეგულებათ. მოქალაქეების შიდა მიგრაცია კი აჩენს საცხოვრებელი ადგილების გაჩენის აუცილებლობას. შესაბამისად, სამშენებლო ბიზნესიც ცდილობს, რაც შეიძლება მეტი მშენებლობა განახორციელოს.  თუმცა, ის, რომ დედაქალაქში მშენებლობების ასეთი ტემპით ზრდა იწვევს იმას, რაც უკვე რეალობაა  -  თბილისის ყველა უბანში მიმდინარეობს მშენებლობები და ფაქტობრივად, თავისუფალი მიწა აღარ არსებობს,“-განაცხადა გვანცა გუჯელაშვილმა.

 კომპანიაში მიაჩნიათ, რომ დედაქალაქში მშენებლობების ზრდის ტენდენცია ბევრი მიმართულებით გაზრდის პრობლემას.

„ჩვენი კომპანიის დაკვირვებით, მშენებლობების გაზრდამ, რომელმაც თავის მხრივ მიწოდებაც გაზარდა, უძრავი ქონების ფასების შემცირება გამოიწვია. პრობლემაა ასევე ის, რომ ზემოხსენებული მშენებლობები ძირითადად უხარისხოდ და სხვადასხვა სამართლებრივი დარღვევით ხორციელდება, რამაც შეიძლება, დღეს თუ არა მომავალში ადამიანების სიცოცხლეს  დიდი საფრთხე შეუქმნას,“-განმარტავს გუჯელაშვილი.

„Myclien.ge“-ში აცხადებენ, რომ „ის რეგულაციები, რომლის განხორციელებაც იგეგმება და რომელიც მშენებლობის ნებართვების გამკაცრებას ითვალისწინებს, ხელს შეუწყობს მშენებლობის ხარისხის გაუმჯობესებას; ხოლო ის სამშენებლოები, რომლებიც სტანდარტებს ვერ დააკმაყოფილებენ ავტომატურად ჩამოშორდებიან საქმიანობას. შეიძლება, ამან გამოიწვიოს უძრავი ქონების ფასების ზრდა, მაგრამ იმ სავალალო შედეგებს, რომელიც შესაძლოა, დადგეს, ჯობია“.