თბილისის ცენტრში ახალი ველობილიკი აშენდება- ამის შესახებ ინფორმაციას თბილისის მერია ავრცელებს. როგორც ცნობილია, უწყებამ ველობილიკის მოსაწყობად ტენდერი უკვე გამოაცხადა.

 დედაქალაქის მთავრობაში  აცხადებენ, რომ მორიგი ველობილიკი თბილისის სახელმწიფო უნივერსიტეტის მაღლივ კორპუსთან დაიწყება, შემდეგ გაივლის სანდრო ეულის ქუჩას, ვაჟა ფშაველას გამზირს, მარიჯანისა და ქავთარაძის ქუჩებს, შემდეგ ყაზბეგის გამზირს და პეკინის ქუჩაზე დასრულდება.

  წინასწარი ინფორმაციით, ველობილიკის სიგრძე 5.1 კმ, ხოლო სიგანე ორივე მიმართულებით 3 მეტრის იქნება, ნათქვამია სატენდერო დოკუმენტში.

 ტენდერის პირობების თანახმად, განცხადების მიღება 2 მარტს დაიწყება და 5 მარტს დასრულდება. შესყიდვების სავარაუდო ღირებულება 31.8 ათას ლარს შეადგენს.

 გარდა ამისა, ვრცელდება ინფორმაცია, რომ პეკინის ქუჩაზე არსბული ველობილიკი , რომელიც 2017 წელს მოეწყო, შესაძლოა, მტკვრის სანაპიროზე არსებული ველომარშრუტის მეშვეობით დედაენის ბაღსაც დაუკავშირდეს.  

უძრავი ქონების სააგენტო „Myclient.ge“-ს დირექტორი, გვანცა გუჯელაშვილი ველობილიკების მოწყობას დადებითად აფასებს და განმარტავს, რომ სიახლე დედაქალაქს საცობების პრობლემის მოგვარებაშიც დაეხმარება.

  „იმ პირობებში, როცა თბილისი საცობების ქალაქად გადაიქცა, ველობილიკების მოწყობა ნამდვილად აუცილებელია, რადგან თუკი შესაბამისი ინფრასტრუქტურა მოეწყობა და დაცული იქნება უსაფრთხოების ზომები, მოქალაქეებში განჩდება სურვილი, ველოსიპედი გადაადგილების საშუალებად გამოიყენონ. ასეთი ტრადიცია ბევრ ქვეყანაშია და საკმაოდ წარმატებულიც,“-განმარტავს გვანცა გუჯელაშვილი.

 ველობილიკს, რომელიც პეკინის მოედანზე მოეწყო, საზოგადოების, პოლიტიკური სპექტრისა და ექსპერტთა ნაწილი სკეპტიკურად შეხვდა. არგუმენტად კი ასახელებდნენ იმას, რომ „ველობილიკის ამ ფორმით მოწყობა სისტემიდან ამოვარდნილია და თუკი თბილისის ყველა უბანში არ მოხდება მისი განვრცობა, მისი არსებობა ფუნქციას დაკარგავს“.

ექსპერტთა ნაწილის აზრს იზიარებს გვანცა გუჯელაშვილიც. მისი განმარტებით, „ვინაიდან დედაქალაქის მოსახლეობა დიდი სისწრაფით იზრდება, შენდება ახალი საცხოვრებელი კორპუსები და ქალაქის ინფრასტრუქტურა იტვირთება, კარგი იქნება, თუ ველობილიკები დედაქალაქის ყველა უბანში მოეწყობა“.