დედაქალაქის მიწათსარგებლობის გენერალურ გეგმაში ძირეული ცვლილებები არ იქნება, - ამის შესახებ მიწათსარგებლობის გენერალურ გეგმაზე მომუშავე ჯგუფის, „სითი ინსტიტუტ საქართველოს“ დირექტორმა, მამუკა სალუქვაძემ განაცხადა.  სალუქვაძის განმარტებით, ძირეული შენიშვნები დედაქალაქის მერიას არ ჰქონია, ამიტომ გენგეგმაში ძირეული ცვლილებებიც არ იქნება. 

 „შენიშვნა თუ არ იწვევს ძირეულ ცვლილებას, ბუნებრივია, ეს არც იქნება. იქ იყო რიგი საკითხების დაზუსტებები, დაკონკრეტება და განმარტება, რაზეც სამსახურებთან ვმუშაობთ და იქნება გათვალისწინებული. რაც შეეხება საერთაშორისო საფინანსო ინსტიტუტებისა და ადგილობრივი ექსპერტების მოსაზრებებს, რომლებიც გენგეგმის შეფასების ეტაპზე ჩაერთნენ პროცესში, ჯერჯერობით მათი პოზიცია არ ვიცით. მთავარია საფუძვლიანად მოხდეს იმ დოკუმენტის გაცნობა, რომელიც საკმაოდ  მასშტაბურია. ექსპერტიზას ვერავინ ჩაატარებს, თუ მხოლოდ ერთი ტომი ან ტომნახევარი წაიკითხა. დეტალურად გაცნობაა საჭირო და მხოლოდ ამის შემდეგ გვეცოდინება, ალბათ, მათი პოზიცია“, - განაცხადა სალუქვაძემ. 

 რაც შეეხება კონკრეტულ შენიშვნებს, რაც გენგეგმაზე მომუშავე ჯგუფის მიმართ თბილისის მერიას ჰქონდა, სალუქვაძე აცხადებს, რომ საკითხების ნაწილზე შეთანხმება მოხდა, ნაწილი კი უბრალოდ დაზუსტდა. 

„მაგალითად, გენგეგმაში არ იყო ქუჩების მოწესრიგების საკითხი, რაც არასწორად გაიგეს. წაიკითხავენ ქუჩათა ქსელს, ჰქონიათ, რომ ქუჩების მოწესრიგებაა. აქ ლაპარაკი იყო ქუჩათა ქსელის იერარქიაზე და კატეგორიზაციაზე. ჩვენ წარვუდგინეთ როგორც 

ევროპული, ასევე არსებული სამშენებლო ნორმების და წესების შესაბამისი, მათ თქვეს ევროპული როგორ შეესაბამება იმას, რაც ჩვენთან არის მიღებული და მოქმედიო. ჩვენი მხრიდან წარდგენილი იყო ორივე, რომელიც ტრანსპორტის სფეროში მოღვაწე საერთაშორისო ექსპერტების მიერ იყო შედეგნილი, სწორედ მათ წარმოადგინეს ევროპული გამოცდილება. მაგალითად, წარდგენილი იყო ჩქაროსნული კატეგორიზაცია, საქალაქო და ა.შ. ჩვენ ახლა მივანიშნეთ, თუ როგორ შეესაბამება ევროპულს იმ სამშენებლო ნორმების გათვალისწინებით არსებული მდგომარეობა. 

ასევე იყო რკინიგზაზე საუბარი, რაზეც ფაქტობრივად, ერთ სიტყვაზე გვაქვს აზრთა სხვადასხვაობა. ითხოვენ ჩაიწეროს, რომ კვლევები დაადგენს, რა ტვირთები გაივლის იმ დერეფანში, რომელიც ჩვენ შევინარჩუნეთ. არსებული სარკინიგზო ხაზის აღება და შემოვლით გზაზე გადატანა არის არსებულ გენგეგმაში და დამტკიცებულია საკრებულოს მიერ. ეს ითვალისწინებს 10-კილომეტრიანი მონაკვეთის აღებას. ჩვენ პირველ ეტაპზე ვეთანხმებოდით ამას, მაგრამ მოხდა შემდგომ მსჯელობები, თვითონ სამსახურმა ჩათვალა, რომ მერიის მხრიდან არ არის საკმარისი კვლევები ჩატარებული, როცა ასეთი გადაწყვეტილება მიიღეს წინა გენგეგმის მიღების დროს. დღესაც მიდის შეხვედრა ამ საკითხთან დაკავშირებით, მიდის კვლევები და შეთანხმებულები ვართ, რომ სარკინიგზო დერეფანი რჩება, რა გაივლის იქ, იქნება ტრამვაი, საქალაქო, სამგზავრო მატარებელი თუ სხვა ელექტროტრანსპორტი, ამას დააკონკრეტებენ თვითონ, როდესაც ჩატარდება დეტალური, ძირეული კვლევები „საქართველოს რიკინიგზის“ მიერ. რაც შეეხება შემოვლით რკინიგზას, ჩვენ ყველა ვარიანტში გვინდა გადავიტანოთ სატვირთო, რადგან სახიფათო, საშიში ტვირთებია. ამაზე ორი აზრი არ არსებობს, სატვირთო აუცილებლად გადადის. საუბარია იმაზე, ახლა რომელ მარშრუტზე გაივლის შემოვლითი რკინიგზა, იმ მარშრუტზე, რომელიც გვაქვს და ბევრი ექსპერტი იწუნებს, თუ სხვა მარშრუტზე იქნება ლაპარაკი. ესეც კვლევებით უნდა დადგინდეს. რაც მთავარია, ჩვენ დავტოვეთ არსებული სარკინიგზო დერეფანი. 

რაც შეეხება ზონირების საკითხს, სადაც შეიძლებოდა ჩასწორება, ჩავასწორეთ. გარკვეულ ტერიტორიებთან დაკავშირებით შეიძლება მათი აზრის გათვალისწინება, ზოგან არ შეიძლება. კიდევ ერთხელ ვიმეორებ, ამას წლები სჭირდება და მუდმივად ცვალებადი სიტუაციაა. ამის მართვის საკითხებს არქიტექტურის სამსახური აიღებს თავის თავზე. ძირითადი გადაწყვეტები, რაც გენგეგმაში უნდა იყოს, არის და იქნება, დანარჩენს არქიტექტურის სამსახური მიადევნებს თვალს“, - განაცხადა სალუქვაძემ. 

რაც შეეხება ჯარიმას, რომელიც დედაქალაქის მერიამ გენგეგმაზე მომუშავე ჯგუფს დააკისრა, როგორც სალუქვაძე აცხადებს, მათ არ გადაუხდიათ. მისივე თქმით, „სითი ინსტიტუტ საქართველომ“ მერიის არქიტექტურის სამსახურს ჯარიმის დასაბუთება მოსთხოვა, რაზეც მათ პასუხი ჯერჯერობით არ მიუღიათ. 

გენგეგმაზე მომუშავე ჯგუფს თბილისის მერიამ გარკვეული ჩასწორებებისთვის 45 დღიანი ვადა მისცა, რომელიც რამდენიმე დღეში იწურება. „სითი ინსტიტუტ საქართველოს“ დირექტორის ინფორმაციით, შესწორებული დოკუმენტი მერიას 26 თებერვალს წარედგინება.