მოქალაქეებს, რომლებსაც მშენებლობის დაწყება სურთ, აინტერესებთ, თუ რა დოკუმენტებია საჭირო სამშენებლო ნებართვის მისაღებად, ვის უნდა მიმართონ, რა პროცედურები უნდა გაიარონ და ა.შ.

  უძრავი ქონების სააგენტო „Myclient.ge“ დაკომპლექტებულია პროფესიონალი იურისტებისგან, რომლებიც ზემოაღნიშნული საკითხით დაინტერესებულ მოქალაქეებს მათთვის საჭირო ინფორმაციას მიაწვდიან. ამჯერად, სამშენებლო ნებართვასთან დაკავშირებით დეტალურ ინფორმაციას კომპანია Myclient.ge-ს დამფუძნებელი, ოთარ კაჭკაჭაშვილი მოგაწვდით.

როგორ რეგულირდება საქართველოს კანონმდებლობაში  სამშენებლო ნებართვასთან დაკავშირებული  საკითხები?

 სამშენებლო ნებართვის გაცემა-მიღებასთან დაკავშირებულ საკითხებს „სამშენებლო ნებართვის შესახებ საქართველოს კანონი“ აწესრიგებს. ამ კანონის საფუძველს „არქიტექტურული საქმიანობის შესახებ“ და „სამეწარმეო საქმიანობის ლიცენზიისა და ნებართვის გაცემის საფუძვლების შესახებ“ საქართველოს კანონები წარმოადგენს. იგი საქართველოს მთელ ტერიტორიაზე მშენებლობის ნებართვის გაცემის დამატებით პირობებს განსაზღვრავს.

„სამშენებლო ნებართვის შესახებ საქართველოს კანონით“ მშენებლობის ნებართვა გაიცემა მშენებლობაზე, რეკონსტრუქციასა და დემონტაჟზე.

რა დოკუმენტები უნდა წარადგინოს დაინტერესებულმა პირმა სამშენებლო ნებართვის მისაღებად?

დამკვეთი მშენებლობის ნებართვის (მათ შორის, განსაკუთრებული მნიშვნელობის ობიექტების მშენებლობის ნებართვის) მისაღებად „სამეწარმეო საქმიანობის ლიცენზიისა და ნებართვის გაცემის საფუძვლების შესახებ“ საქართველოს კანონით განსაზღვრულ ორგანოში (მაგალითად ადგილობრივი თვითმმართველობა) განცხადებასთან და სანებართვო მოსაკრებლის გადახდის დამადასტურებელ საბუთთან ერთად წარადგენს:

ა) ადგილობრივი მმართველობის ორგანოს შესაბამის სამსახურთან შეთანხმებულ არქიტექტურულ პროექტსა და საპროექტო დოკუმენტაციას (სამ ეგზემპლარად), მათ შორის:

• არქიტექტურულ-გეგმარებით დავალებას;
•  დავალებას დაპროექტებაზე;
• მიწის ნაკვეთის საკადასტრო დოკუმენტაციას;
• საინჟინრო-გეოლოგიურ დასკვნასა და ტოპოგრაფიულ საფუძველს;
• გარემოსდაცვით ნებართვას;
• შეთანხმებულ ტექნიკურ პირობებს;
• მშენებლობის ორგანიზების პროექტს;
•  სათანადო საექსპერტო დასკვნას;
•  მუშა დოკუმენტაციას;
•  ცნობას ამ კანონის მე-8 მუხლის პირველი პუნქტის მოთხოვნათა შესრულების შესახებ;

ბ) საპროექტო და სამშენებლო ორგანიზაციების ლიცენზიებისა და შესაბამისი ხელშეკრულებების ასლებს;

გ) სათანადო უწყებების ნებართვებს შემდეგი განსაკუთრებული რეჟიმის ტერიტორიებისათვის:

•  დაცული ტერიტორია;
•  სასაზღვრო ზოლი და სასაზღვრო ზონა;
• კურორტებისა და საკურორტო ადგილების სანიტარიული დაცვის ზონა;
• სანაპირო ზონა;
• რკინიგზის, საავტომობილო გზის, მაგისტრალური მილსადენებისა და მაღალი ძაბვის ელექტროგადამცემი ხაზი­ს გასხვისების ზონები;
•  სათავე ნაგებობების, რადიაციული და სხვა ნარჩენების სამარხების, წყალსაცავებისა და სხვა ობიექტების სანიტარიული ზონები;
• ბუნებრივი და ისტორიულ-კულტურული მემკვიდრეობის უძრავი ძეგლების ტერიტორიები (დასახლებები) და „კულტურული მემკვიდრეობის დაცვის შესახებ“ საქართველოს კანონით განსაზღვრული დამცავი ზონების სისტემაში შემავალი ზონები.