„ბოლო 2 წლის განმავლობაში ჩვენს ქვეყანას 13 ათასამდე ახალი განთავსების ობიექტი დაემატა, შემდეგი 2 წლის განმავლობაში კი დამატებით კიდევ 22 ათასი განთავსების ოთახი უნდა გაიხსნას,"-  აღნიშნული განცხადება ეკონომიკის მინისტრმა, დიმიტრი ქუმსიშვილმა თბილისში ახალი სასტუმროს „რამადა ენკორ თბილისის“განხსნაზე გააკეთა. ქუმსიშივილის თქმით, დღეს არსებული საერთაშორისო ვიზიტორების რაოდენობა 11 მილიონამდე უნდა გაიზარდოს. 

„აღნიშნული სასტუმროს ინვესტიციები არის ერთ-ერთი საუკეთესო მაგალითი სახელმწიფოსა და კერძო სექტორის თანამშრომლობისა. 2014 წლის ბოლოს საინვესტიციო ვალდებულებებით, ღია აუქციონზე გამოვაცხადეთ აღნიშნული უძრავი ქონების გაყიდვა და შედეგიც დღეს უკვე დაგვიდგა ძალიან წარმატებული. მე მინდა ჩვენს ქალაქს მივულოცო, მივულოცო თვითონ ჯგუფს, რადგანაც ძალიან მნიშვნელოვანია ახალი განთავსების ობიექტის გახსნა და მნიშვნელოვანია ახალი სამუშაო ადგილების შექმნა. ბოლო 2 წლის განმავლობაში ჩვენს ქვეყანას 13 ათასამდე ახალი განთავსების ობიექტი დაემატა, შემდეგი 2 წლის განმავლობაში კი დამატებით კიდევ 22 ათასი განთავსების ოთახი უნდა გაიხსნას ,“  - განაცხადა დიმიტრი ქუმსიშვილმა.

 კომპანია „მ2 უძრავი ქონებამ“152 ნომრიანი სასტუმრო „რამადა ენკორ თბილისი“ დღეს გახსნა. სასტუმროში 100-მდე ადამიანია დასაქმებული. მისი საინვესტიციო ღირებულება კი 14 მილიონი ამერიკული დოლარია. 

„რამადა“ მსოფლიოს უმსხვილესი სასტუმრო ჯგუფის "ვინდჰემის" წევრია, რომელიც მსოფლიოს მასშტაბით 850 სასტუმროს ფლობს. „რამადა“ 2017 წელს ევროპის ყველაზე მზარდ ბრენდად დასახელდა.