უსაფრთხოების ნორმების დარღვევით გამოწვეული უბედური შემთხვევები,  უხარისხო მშენებლობები, სამშენებლო კომპანიების გაკოტრება, სამშენებლო კომპანიებისთვის მშენებლობის ნებართვის შეჩერება- ამ და სხვა პრობლემურ საკითხებს მედიასაშუალებები ყოველდღიურად აშუქებენ. როგორ შეიძლება, ზემოჩამოთვლილი პრობლემებისგან თავის არიდება? პრობლემის გადაჭრის საკუთარ ხედვას უძრავი ქონების სააგენტო „Myclient.ge“-ს დირექტორი, გვანცა გუჯელაშვილი შემოგთავაზებთ.

 უძრავი ქონების სააგენტო Myclient.ge-ს დირექტორს, გვანცა გუჯელაშვილს მიაჩნია, რომ ამ პრობლემების მოსაგვარებლად ერთ-ერთი გამოსავალი ის არის, რომ სამშენებლო კომპანიებმა მშენებლობების დაზღვევაზე იზრუნონ.

„სამშენებლო დაზღვევის სერვისს განვითარებულ ქვეყნებში უკვე რამდენიმე ათეული წელია, აქტიურად იყენებენ და მათი პრაქტიკიდან გამომდინარე, შემიძლია, ვთქვა, რომ ეს სერვისი მშენებლობის პროცესს ბევრად დაცულსა და სანდოს გახდიდა. სამწუხაროდ, ჩვენთან ჯერ კიდევ ვერ დამკვიდრდა ხარისხზე ორიენტირებულობის ტენდენცია. თუკი სამშენებლო ბიზნესში ჩართული ადამიანები იზრუნებენ და დააზღვევენ მშენებლობის პროცესს, მომხმარებლების წინაშე აღებულ ვალდებულებებს დროულად და მაღალი ხარისხით შეასრულებენ,“-განაცხადა გვანცა გუჯელაშვილმა.

რას შეიძლება, მოიცავდეს სამშენებლო დაზღვევა ? 

 მშენებლობა რთული, კომპლექსური და ძალიან საპასუხისმგებლო პროცესია, სადაც ყოველთვის არსებობს ისეთი რისკების განვითარების საშიშროება, როგორიც არის დასაქმებული პერსონალის ჯანმრთელობის დაზიანება, უხარისხო მასალებით გამოწვეული ზიანი, სამშენებლო პროცესის შეჩერება-შეფერხება, კომპანიის ფინანსური ზარალი და ა.შ.

 გვანცა გუჯელაშვილის თქმით, „მშენებლობის პროცესში არსებული რისკების განვითარება აზარალებს როგორც თავად სამშენებლო კომპანიას, ისე იქ დასაქმებულ ადამიანებს და რაც მთავარია, აზარალებს კლიენტებს, რომლებმაც შესაძლოა, წლების მანძილზე დაგროვებული დანაზოგი ან ბანკიდან აღებული უზარმაზარი ვალი უძრავი ქონების შეძენაში ჩადო. ამიტომ, კომპანიები ვალდებულები არიან, გაითვალისწინონ და დააზღვიონ თითოეული რისკი, რათა საკუთარ ბიზნესთან ერთად სხვა ადამიანის ინტერესებიც დაიცვან“.