ბოლო ორ თვეში თბილისის მერიის ზედამხედველობის სამსახურმა სხვადასხვა დარღვევის გამო 46 მშენებარე ობიექტი შეაჩერა. 
ერთ-ერთი ყველაზე გახმაურებული შემთხვევა სამშენებლო კომპანია „სვეტს“, რომელიც მშენებლობის ნებართვის უქონლობის გამო ერთ-ერთ ობიექტზე საცხოვრებელი კორპუსების დასრულებას ვერ ახერხებს, არადა, მობინადრეებისთვის ბინები  ჯერ კიდევ გასული წლის დეკემბერში უნდა ჩაებარებინათ. კომპანიაში ამბობენ, რომ მშენებლობის შეჩერების მიზეზი მთავრობის #41 დადგენილებაში შეტანილი ცვლილებაა, რომელიც მეტწილად სახანძრო უსაფრთხოების ნორმების გამკაცრებას ეხება. თუმცა, ამ ნორმის ამოქმედებისას ითქვა, რომ ახალი მოთხოვნები მხოლოდ 2017 წლიდან დაწყებულ მშენებლობებს შეეხებოდა, კომპანიას კი ამჟამად შეჩერებული პროექტები გაცილებით ადრე აქვს დაწყებული. ამდენად, ჩნდება ეჭვი, რომ კომპანია მშენებლობას უნებართვოდ და შესაბამისად, უკანონოდ აწარმოებდა, ახლა კი ახალ ნებართვას მანამ ვერ აიღებს, სანამ უკვე სანახევროდ აშენებულ კორპუსებს ახალ მოთხოვნებთან შესაბამისობაში არ მოიყვანს. 

თბილისის მერიის ზედამხედველობის სამსახურის ინფორმაციით, 2018 წლის 1-ლი იანვრიდან 2018 წლის 28 თებერვლის ჩათვლით სამშენებლო სამართალდარღვევაზე წარმოება 160 სუბიექტის მიმართ დაიწყეს. აქედან 84 სუბიექტზე შედგა შემოწმების აქტი, ხოლო 43 სუბიექტზე მიღებულ იქნა დადგენილება. ამ დადგენილებებიდან 13 მიღებულია სუბიექტის დაჯარიმების, ხოლო 30 მშენებლობის შეწყვეტის თაობაზე. ჯამში ზემოაღნიშნულ პერიოდში 46 ობიექტი შეჩერდა. (წყარო: კვირის პალიტრა)
 

 უძრავი ქონების სააგენტო „Myclient.ge“-ს ერთ-ერთ დამფუძნებელს, ადვოკატ დავით მუმლაძეს მიაჩნია, რომ „თუ მერია ერთხელ მაინც დახუჭავს თვალს სამშენებლო კომპანიების უკანონო ქმედებებზე, უბრალოდ, კანონი აღარ აღსრულდება. რაც შეეხება იმ მენაშენეებს, რომლებიც შესაძლოა ამის გამო დაზარალდნენ, ბუნებრივია, უნდა არსებობდეს კანონისმიერი შეთანხმება დეველოპერსა და კლიენტს შორის. კომპანიას უნდა ჰქონდეს აქტივი, რომლითაც შემდგომში დაზარალებულებს დააკმაყოფილებს. ამის გარეშე ეს ადამიანები დაზარალდებიან.

 ერთია ზედამხედველობის სამსახურის კონტროლი, მეორე კი დეველოპერის კეთილსინდისიერება, მაგრამ უძრავი ქონების შეძენის მსურველთა პასუხისმგებლობაზეც უნდა ვისაუბროთ. მათ შეუძლიათ, მერიის ოფიციალურ ვებგვერდზე გადაამოწმონ, არის თუ არა გაცემული მშენებლობის ნებართვა მათთვის საინტერესო ობიექტზე. გარდა ამისა, კარგი იქნება პროცესში იურისტის ჩართვა, რადგან ხშირად დეველოპერების შემოთავაზებული ხელშეკრულებები მხოლოდ კომპანიების ინტერესებზეა მორგებული. საჭიროა უფლება-მოვალეობების დაბალანსება მყიდველსა და მშენებელს შორის, მყიდველი უნდა დაინტერესდეს კონკრეტული კომპანიის უკვე დასრულებული პროექტებით. ამ შემთხვევაში უძრავი ქონების შეძენის მსურველებს მეტი გარანტია ექნებათ, რომ არ დაზარალდებიან“.