შენობა-ნაგებობების სეისმომედეგობის განმსაზღვრელ ორგანიზაციების თქმით, საქართველოში 8 ბალზე ნაკლები გამძლეობის სეისმომედეგობის მშენებლობა დაუშვებელია. თუმცა,  როგორ უნდა განისაზღვროს, დაცულია თუ არა ქვეყანაში ეს ნორმა, როცა სამშენებლო დარგის ექსპერტების თქმით, „საქართველოში მშენებლობები სეისმომედეგობაზე საერთოდ არ მოწმდება, რადგან ორგანო, რომელმაც მშენებლობები ამ ფაქტორით უნდა შეამოწმონ, არ არსებობს და  შენობა-ნაგებობის უსაფრთხოება სეისმომედეგობის თვალსაზრისით მშენებლის კეთილსინდისიერებაზეა დამოკიდებული“.

სპეციალისტებს ცალსახა პასუხი იმის შესახებ, თუ დაახლოებით რამდენ ბალს გაუძლებს ესა თუ ის შენობა, არ აქვთ, თუმცა,  ხშირად ამბობენ, რომ ახალ აშენებული კორპუსების, დაახლოებით, 60% დასაშვებ ნორმას -  8-ბალიან მიწისძვრის ვერ გაუძლებს.

 როგორ შეიძლება, შეფასდეს მოსალოდნელი საფრთხე, რომლის წინაშე საქართველო და განსაკუთრებით დედაქალაქი დგას? ექსპერტების თქმით, სწორედ ზემოთ აღნიშნული ინსტიტუტების არარსებობის გამო, ამის თქმა შეუძლებელია. კერძოდ, უნდა შეისწავლონ, რა ტიპის შენობა-ნაგებობებისგან შედგება თბილისი, როგორია მათი ხანდაზმულობის ვადა, რა უსაფრთხოების ნორმებია გამოყენებული და როგორ შეიძლება, ეშველოს უკვე ავარიულ შენობებს. ამ დროისთვის მხოლოდ ის ვიცით, რომ ქალაქის ერთი ნაწილი მანამდე აშენდა, ვიდრე სეისმომედეგობის საკითხი წამოიჭრებოდა, უფრო დიდი ნაწილი კი გასული საუკუნის 60-დან 80-იანი წლების ბოლომდე პერიოდში განაშენიანდა და მაქსიმალური სეისმოგამძლეობა 7 ბალზეა გათვლილი. ექსპერტების განმარტებით, საგანგებო კვლევების გარეშეც ჩანს, რომ ბოლო 15 წლის განმავლობაში აშენებულ შენობებში, ფაქტობრივად, არ გამოუყენებიათ სეისმოიზოლაცია. უსაფრთხოების ასეთი მეთოდი მხოლოდ გმირთა მოედნის ესტაკადებზეა გათვალისწინებული.

მოქალაქეებს ხშირად უჩნდებათ კითხვა, რამდენად გამძლეა სახლი, რომელშიც ცხოვრობს, თუმცა, დედაქალაქის მერიის ინფორმაციით, შენობა-ნაგებობების წლოვანების ან სეისმომედეგობის დასადგენად კვლევები არ ჩატარებულა და არც სტატისტიკა არსებობს. შესაბამისად, ამ საკითხით დაინტერესებულ მოქალაქეებს, იმის გასაგებათ, თუ როგორ სახლში ცხოვრობს, მხოლოდ კერძო ექსპერტთა ჯგუფის დახმარებით შეუძლიათ.

რატომ არის აუცილებელი შენობა-ნაგებობების სეისმომედეგობის დადგენა ?

  ექსპერტების განცხადებით, ბოლო საუკუნის მანძილზე საქართველოში 20-ზე მეტი მიწისძვრა მოხდა; მათ შორის, ნახევარი დამანგრეველი იყო. მაგალითად, 2002 წლის მიწისძვრამ მხოლოდ დედაქალაქს 24 000 ავარიული შენობა დაუტოვა. სამომავლოდ კი, ძლიერი მაგნიტუდის მიწისძვრის შემთხვევაში, შესაძლოა ეს  რიცხვი და მიწისძვრის შედეგები სავალალო აღმოჩნდეს.

 ექსპერტების აზრით, პრობლემისგან თავის დასაცავად ერთ-ერთი გამოსავალი შენობების სეისმოიზოლაციაა.

 რას ნიშნავს სეისმოიზოლაცია?

 სეისმოიზოლატორი არის მაღალხარისხოვანი რეზინისა­ და ლითონის ფირფიტის ფენებით შეკრული საყრდენი. მას საძირკველსა და შენობას შორის სპეციალურად დატოვებულ ღრეჩოში ამაგრებენ. მიწისძვრისას მოძრაობს იზოლატორების ქვემოთ მოქცეული ნაწილი, იზოლატორების ზემოთ მოქცეული შენობა კი უძრავია. საძირკველში­ შემავალი ენერგიის დიდი ნაწილი აკუმულირდება და გაიფანტება რეზინლითონის სისტემაში. შესაბამისად, შენობა აღარ ირხევა და აღარ არის ნგრევის საფრთხე. სეისმოიზოლატორით მიწისძვრის ზემოქმედება 1,5-2 ბალით მცირდება. თუ თბილისში 8-ბალიანი მიწისძვრა მოხდა, სეისმოიზოლატორი დარტყმას 6 ბალამდე შეამცირებს, ანუ უფრო ნაკლები ძალა მოედება შენობას. ეს გადაარჩენს ნულის, ანუ მიწის ზემოთ შენობას სრულად - კონსტრუქციები არ დაინგრევა და ადამიანებიც არ დაიღუპებიან. სეისმოიზოლატორის გარეშე 7-ბალიანი მიწისძვრის დროს ტიხრები, კომუნიკაციები, ბინებში ავეჯი - ყველაფერი იმსხვრევა, სეისმოიზოლატორი კი საძირკველშივე ახშობს მიწის რყევის შედეგად გაჩენილ ენერგიას, რეზინისა და ლითონის ფენები იძლევა საშუალებას, მიწის მოძრაობას მიჰყვეს...“  

წყარო:bpn.ge