დედაქალაქში მიმდინარე მშენებლობებზე ზედამხედველობისა და მონიტორინგის გაძლიერება იგეგმება. ამის შესახებ განცხადება დედაქალაქის მერმა, კახა კალაძემ თბილისის მთავრობის დღევანდელ სხდომაზე გააკეთა.  

 „მერიას აქვს ბევრი სიახლე, აწარმოებს სხვადასხვა სამუშაოს დედაქალაქის საკეთილდღეოდ და საჭიროა ამის სწორად განხორციელების ხელშეწყობა. 
საჭიროა ზედამხედველობის და მონიტორინგის გაძლიერება იმ დარღვევებზე, რომლებიც აზარალებს თბილისს,“-განაცხადა კალაძემ.  

მისივე თქმით, აუცილებლად უნდა შეიცვალოს ზედამხედველობის სისტემა, უფრო მობილური და ეფექტური უნდა გახდეს დაჯარიმების პროცესი. 

 „კანონის დაცვა დედაქალაქში განაპირობებს სანქციების გაზრდილ რაოდენობას. ჩემთვის მტკივნეულია და მიუღებელია, როცა თბილისთან მიმართებაში ხშირად იხმარება სიტყვა უსისტემო, უკანონო, ქაოსური. თბილისი თანამედროვე დედაქალაქია, და ეს უწესრიგობა უნდა დავასრულოთ. ზედამხედველობის, როგორ ინსტიტუციის გაძლიერება და დახვეწა ჩვენი ერთ-ერთი პრიორიტეტია, აქედან გამომდინარე, ვავალებ ქალაქის ვიცე-მერს, ირაკლი ხმალაძეს, რომ მოამზადოს და დროულად დაიწყოს ზედამხედველობის სისტემისა და ზედამხედველობის სამსახურის რეფორმა, მათ შორის ამ სამსახურის თანამშრომლების გადამზადება-ტესტირების პროცესი, ყველანაირი აღჭურვილობა, რაც კი არის საჭირო ამითვის, ეს იქნება კამერები, ფორმები, ავტომობილები, შეიძინეთ. ყველაფერი გააკეთეთ, რომ ეს სამსახური იყოს უფრო ეფექტური და უმაღლეს დონეზე განახორციელოს საზედამხედველო ფუნქციები. ასევე მნიშვნელოვანია შეიქმნას რეაგირების ეფექტიანი მექანიზმი, დაიხვეწოს მოქალაქეებთან და იურიდიულ პირებთან კომუნიკაციის მეთოდები. ასე რომ, მე მგონია, ეს იქნება ძალიან მნიშვნელოვანი რეფორმა ამ სამსახურის“, - განაცხადა თბილისის მერმა. 

 კალაძის განცხადებით, აღნიშნულთან დაკავშირებით უკვე მომზადდა საკანონმდებლო ცვლილებების პაკეტი, რომელიც პარლამენტს უკვე გადაეგზავნა. მისი თქმით, ცვლილებებით, უფრო ეფექტური გახდება ზედამხედველობის ფუნქციები შემდეგი დარღვევების მიმართ: დედაქალაქის იერსახის დამახინჯება; თბილისის ტერიტორიის დაზიანება სამშენებლო ან სარემონტო სამუშაოების წარმოებისას; თბილისის თვითმმართველი ერთეულის ტერიტორიაზე გარე ვაჭრობა შესაბამისი ნებართვის გარეშე; გარე რეკლამის განთავსების სანებართვო პირობების დარღვევა, რეკლამის უნებართვო განთავსება ან არასათანადო რეკლამის განთავსება. მე მგონია, რომ ამ მიმართულებით საჭიროა კანონმდებლობის გამკაცრება, რათა ეფექტური იყოს ზედამხედველობის სამსახური“.