ეროვნული ბანკის მიერ გამოქვეყნებული ინფორმაციის თანახმად, ბანკების 2017 წლის მე-4 კვარტლის ფინანსურ ანგარიშებით, კომერციული ბანკებიდან სესხის მისაღებად გასულ წელს ბანკების სასარგებლოდ 14,993,901,606 ლარის საცხოვრებელი ფართი დაიტვირთა. 

კერძოდ, ანგარიშგების თანახმად, მოთხოვნის უზრუნველყოფის მიზნით ყველაზე მეტი - 6,080,480,275 ლარის საცხოვრებელი ფართი „თიბისი ბანკის“ სასარგებლოდ დაიტვირთა. შემდეგ მოდის „საქართველოს ბანკი“, რომლის სასარგებლოდაც 2017 წელს ჯამში, 5,689,112,324 ლარის ღირებულების საცხოვრებელი ფართი დაიტვირთა, ხოლო მე-3 ადგილზე ამ კუთხით, „ვითიბი ბანკია“, რომლის სასარგებლოდ დატვირთული საცხოვრებელი ფართის ღირებულება - 875,781,710 ლარი იყო. 

რაც შეეხება 2016წლის ანალოგიურ პერიოდს, სებ-ის მონაცემებით, კომერციული ბანკების სასარგებლოდ 1,126,082,580 ლარის ღირებულების საცხოვრებელი ფართი დაიტვირთა. თუმცა, აღსანიშნავია, რომ 5 ბანკს - „ტერა ბანკს“, „თიბისის“, „პროკრედიტ ბანკს“, „კრედოსა“ და „საქართველოს ბანკს“ 2016 წლის მე-4 კვარტალის ანგარიშგებაში არ არის მითითებული თუ რა ღირებულების საცხოვრებელი ფართი დაიტვირთა მათ სასარგებლოდ.

ახლა სტატისტიკას თავი დავანებოთ და ვისაუბროთ საკითხზე, თუ რა უარყოფითი შედეგი შეიძლება, მოჰყვეს უძრავი ქონების იპოთეკით დატვირთვას.

საქმე ის არის, რომ საბანკო საფინანსო სექტორის მხრიდან დაზარალებული მოსახლეობის შესახებ ბოლო პერიოდში ხშირად იწერება. მედიასაშუალებებში გავრცელებულ ინფორმაციებს თუ დავეყრდნობით, იმ მოქალაქეთა რიცხვი, რომლებსაც საბანკო სექტორთან ურთიერთობა კრახით დაუსრულებიათ, მუდმივად მზარდია. პრობლემა ბევრია, თუმცა, მათ შორის, ყველაზე ხშირად იპოთეკით დაზარალებული მოქალაქეების შესახებ გვესმის. საქმე ის არის, რომ მოქალაქეები, რომლებიც უძრავი ქონების უზრუნველყოფით იღებენ სესხს, არ ითვალისწინებენ რიგ საკითხებს, რომელებიც შესაძლოა, სამომავლოდ გაპრობლემდეს.
 რა უნდა იცოდეს ადამიანმა, რომელიც თავის ბინას და უძრავ ქონებას იპოთეკით ტვირთავს? - საზოგადოებისთვის აქტუალურ და მნიშვნელოვან საკითხზე სამართლებრივ ინფორმაციას უძრავი ქონების სააგენტო „Myclient.ge“-ს დამფუძნებელი, ოთარ კაჭკაჭაშვილი მოგვაწვდის. 

რა უნდა გაითვალისწინოს  იპოთეკური სესხის აღებისას?

დავიწყოთ ყველაზე მარტივით: ვიდრე თავის ქონებას იპოთეკით დატვირთავს, მსესხებელმა წინასწარ უნდა დაადგინოს მსესხებლის გადახდაუნარიანობა. იმ გარემოების გათვალისწინებით, რომ მოქმედი კანონმდებლობის თანახმად პირის პერსონალური ინფორმაციის, გადახდაუნარიანობის გადამოწმება ხელმისაწვდომი არ გახლავთ ნებისმიერი მოქალაქისთვის, აღნიშნული საკითხი სასესხო ურთიერთობის ერთ-ერთ დიდ რისკს წარმოადგენს.

განსაკუთრებით დიდია რისკია ისიც, რომ მსესხებელი კრედიტორს სესხის პროცენტს გადასცემს ხელზე, ყოველგვარი დოკუმენტაციის დამოწმების გარეშე.  საკითხის გაპრობლემების შემთხვევაში, მას უჭირს თანხის გადახდის დადასტურება. ამიტომ, ნებისმიერი ქმედება, რასაც მხარეები განახორციელებენ, უნდა გაფორმდეს წერილობით. ამ შემთხვევაშიც, უნდა არსებობდეს ოფოციალური დოკუმენტი, რომ მსესხებელმა ნამდვილად გადაუხადა იპოთეკარს პროცენტით გათვალისწინებული თანხა და შეასრულა ნაკისრი ვალდებულება.