USAID-მა და EPRC-იმ სამშენებლო მასალების შესახებ ევრორეგულაციის ზეგავლენის შეფასება გააკეთეს. დოკუმენტში აღნიშნულია, რომ რეგულაციის გავლენა პირდაპირ ან ირიბად შეეხება სამშენებლო სფეროში 2017 წლის მდგომარეობით დასაქმებულ 75 000-მდე და სამშენებლო მასალების წარმოებაში დასაქმებულ 35 000 ადამიანს. 

ბაზარზე დღეს არსებული პროდუქციის საფუძველზე ხარჯთაღრიცხვების შედარებამ აჩვენა, რომ კონსტრუქციის მასალებში (ცემენტი, ბეტონი, არმატურა) ფასთა ზრდა ნაკლებად მოსალოდნელია. წარმოდგენილი კალკულაციის თანახმად, ევროპული სტანდარტით სახლის მშენებლობაში მასალის ხარჯები გაიზარდა 24.7%-ით. 

"რთული სათქმელია, თუ რამდენად შეესაბამება ეს ზრდა, მასალების ღირებულების ზრდას რეგულაციის შემოღების შედეგად. ევროპული სტანდარტის ბლოკისა და სხვა მაკომპლექტებელი მასალების ადგილობრივი წარმოების ამოქმედების შემთხვევაში, მოსალოდნელია, რომ მსგავსი მასალის ფასი დღეს არსებულთან შედარებით შემცირდეს, რაც ამ სხვაობას, სავარაუდოდ, შეამცირებს", - ვკითხულობთ კვლევაში. 

კვლევამ აჩვენა, რომ საშუალოდ, დეველოპერული კომპანიის კალკულაციით, მშენებლობაში სამშენებლო მასალების ფასის წილი 20%-ზე ნაკლებია. სამშენებლო მასალებში კი მათგან მაკომპლექტებელი მასალების მოცულობა და ფასი კონსტრუქციული მასალის ფასებთან 60/40-ზე შეფარდებითაა. 

დღეის მდგომარეობით, მშენებლობაში მოგების მარჟა დიდია (მაგალითად მაშინ, როცა 1 კვადრატული მეტრის თვითღირებულებაა 160-დან მაქსიმუმ 250 დოლარამდე, საბაზრო ფასი 450-დან 1400 დოლარამდეა). ფასწარმოქმნას კი მარკეტინგული გათვლები განსაზღვრავს. შესაბამისად, ობიექტური გათვლებით, სამშენებლო მასალის 24%-ით გაძვირების შემთხვევაში, მოსალოდნელი უნდა იყოს, რომ მშენებლობაში უფრო მეტად გაიზარდოს დანაკარგები და არა გაყიდვის ფასი. უხეში გათვლებით, მასალის ფასის ზრდის ზემოთ წარმოდგენილი სცენარის შემთხვევაში, მშენებლობის თვითღირებულება, უარეს შემთხვევაში, მაქსიმუმ 5%-ით გაიზრდება. 250 დოლარიანი თვითღირებულების შემთხვევაში ეს კვადრატულზე 12,5 დოლარამდეა. არსებული პრაქტიკიდან გამომდინარე, თუ დღემდე მიღებული რეგულაციების გავლენას გავითვალისწინებთ, უძრავი ქონების ფასის მომატების პერსპექტივა არსებობს, კონკრეტულ მონაცემებზე საუბარი კი ძნელია და დამოკიდებული იქნება ბაზარზე. 

მიუხედავად იმისა, გაძვირდება თუ არა ცალკე აღებული პროდუქტი, ექსპერტები ელოდებიან სახელმწიფო შესყიდვებში ფასების ზრდას, რაც დაკავშირებული იქნება იმასთან, რომ მასალების სტანდარტისა და ხარისხის ხარჯზე ვერ მოხდება განსახორციელებელი სამუშაოს ფასის შემცირება ტენდერის დროს. თუ გავითვალისწინებთ, რომ ფასების შემცირების მაჩვენებელი ტენდერების გზით 10%-დან 30%-მდე და მეტადაც მერყეობდა, შეიძლება ვივარაუდოთ, რომ შესასყიდი სამუშაოების დაკონტრაქტებული ღირებულების ზრდაც დაახლოებით ამ მასშტაბით მოხდება. შესაბამისად - სავარაუდოა გაიზარდოს სახელმწიფო სამშენებლო სამუშაოების ხარისხიც. 
 

წყარო: bm.ge