თბილისში „ბიზნეს სახლის“ სამშენებლო-სამონტაჟო სამუშაოებზე გამოცხადებულ 71 მილიონიან ტენდერში, ერთადერთ პრეტენდენტად- შპს „დაგი“ დარჩა. ტენდერში მონაწილე სამი კომპანიიდან, ორმა სატენდერო პირობები ვერ დააკმაყოფილა. ამხანაგობა „ბიზნეს სახლმა“ დისკვალიფიკაცია ტექნიკური დოკუმენტაციის გამო მიიღო, მეორე პრეტენდენტის - „სამშენებლო -სამრეწველო საინვესტიციო კორპორაცია აკკორდის“  დოკუმენტაცია სატენდერო კომისიამ საერთოდ ვერ შეაფასა. ამის მიზეზი კი, კომისიის ინფორმაციით ის გახდა, რომ ელექტრონული ტენდერის შეფასების ველში მათი დოკუმენტაცია ატვირთული არ იყო, ეს კი შეფასებას შეუძლებელს ხდიდა. 
სატენდერო კომისიის გადაწყვეტილებით, შპს „დაგმა“ 3 დღეში ტექნიკური დოკუმენტაცია უნდა დააზუსტოს, რის შემდეგაც გადაწყდება დასახელდება თუ არა ის გამარჯვებულად. 

შპს „დაგი“ ქართული კომპანიაა, რომელსაც არაერთ სახელმწიფო ტენდერში აქვს მონაწილეობა მიღებული, მათ შორისაა მესტიის ცენტრისა და წყალტუბოს რეაბილიტაცია, ასევე სასტუმრო ანაკლიისა და განმუხურის ამფითეატრის მშენებლობა. 

რაც შეეხება ტენდერიდან გამოთიშულ კომპანიებს - „სამშენებლო-სამრეწველო საინვესტიციო კორპორაცია აკკორდი“ აზერბაიჯანული კომპანიის ფილიალია საქართველოში, რომელიც 2010 წელსაა დაფუძნებული. ამხანაგობა „ბიზნეს სახლი“ კი, შპს „კალასისა“ და შპს „ენსისის“ ერთობლივი ორგანიზაცია იყო. 

რაც შეეხება „ბიზნეს სახლს“, ის სახელმწიფოსა და ბიზნესს შორის თანამშრომლობის ახლებურ მოდელს წარმოადგენს, რომელიც ბიზნესისა და იურიდიული პირებისთვის, სხვადასხვა სამინისტროსა თუ სახელმწიფო უწყებაში გაფანტული სერვისების ერთ სივრცესა და ერთიან ელექტრონულ პლატფორმაზე მიწოდებას ითვალისწინებს. 

ჯამში, საუბარია 600-ზე მეტ მომსახურებაზე, რომელსაც ბიზნესი დღეს სახელმწიფოს მხრიდან იყენებს და ყველა მათგანი ერთ სივრცეში იქნება ხელმისაწვდომი.