კომერციულ ფართებზე მოთხოვნა თანდათან იზრდება. მიზეზი ერთია- კომერციული ფართების ყიდვა-გაქირავება ძალიან მომგებიანი ბიზნესია.  

  უძრავი ქონების სააგენტო „Myclient.ge“-ს დირექტორის, გვანცა გუჯელაშივილის განმარტებით,  „კომერციულ ფართების ფასი საცხოვრებელ ბინებთან შედარებით ყოველთვის მაღალია. ბოლო პერიოდში კი, როცა ახლადაშენებული კორპუსების რიცხვი ასე სწრაფად იზრდება, სამშენებლო კომპანიებიც ცდილობენ, რომ მშენებლობაზე გაწეული ხარჯები კომერციული ფართები დააკომპენსირონ. ზოგიერთი კომპანია კიდევ უფრო გრძელვადიან პერსპექტივად ითვალისწინებს ამ ფართებს და თავადვე, სხვადასხვა საჭიროების მიხედვით იყენებს“.

როგორც სააგენტოში განმარტავენ, კომერციულ ფართებზე ყველაზე მაღალი მოთხოვნა ცენტრალურ უბნებშია. გუჯელაშვილის თქმით, პრესტიჟული ადგილების რიგებში მოწინავე ადგილს რუსთაველისა და აღმაშენებლის გამზირი, ჭავჭავაძისა პეკინის ქუჩები და ასევე ძველი თბილისის მიმდებარე ტერიტორიები იკავებს. „მთელს მსოფლიოში ასეა, რომ წამყვანი ბრენდები, კაფე-რესტორნები, ბანკები თუ სხვა, უპირატესობას ყოველთვის ცენტრალურ უბნებს ანიჭებენ და შესაბამისად, ამ ტენდენციას არც ჩვენი დედაქალაქი ჩამოუვარდება,“-განმარტავს იგი.

 რაც შეეხება უშუალოდ იმას, თუ რა ღირს დედაქალაქში კომერციული ფართი, გვანცა გუჯელაშვილი განმარტავს, რომ „კომერციული ფართის ფასები 2-ჯერ მაინც აღემატება საცხოვრებელი ბინების ფასებს, თუმცა ღირებულება ამ შემთხვევაშიც  ადგილმდებარეობის მიხედვით არის განსხვავებული“.

 „უბნების მიხედვით რომ დავიწყოთ, გარე უბნებში კომერციული ფართების ფასი არის 50-70$ ექვივალენტი ლარში. შემდეგ მოდის დიღომი, სადაც 1 კვადრატული მეტრის კომერციული ფართი 50-70$ ექვივალენტი ლარში მერყეობს. ცენტრალური უბნებისკენ უკვე იზრდება და მაგალითად, ვაკეში 1 კვადრატული მეტრი კომერციული ფართის ღირებულება  100-180$-ია, შემდეგ არის დიღმის მასივი 200-300$-ს, ხოლო, იგივე ფასია ძველ თბილისში, სადაც 1 კვადრატული მეტრის კომერციული ფართი 200-300 $ ექვივალენტი ლარში მერყეობს.