სამშენებლო კომპანია „მ2“ ქავთარაძის ქუჩაზე „ხრუშჩოვკების“ ჩანაცვლების პროექტს ამზადებს და უახლოეს პერიოდში მას მერიაში ნებართვის მისაღებად შეიტანს. საუბარია დაახლოებით 300 საცხოვრებელ ბინაზე. 

სამშენებლო კომპანიის ხელმძღვანელი ირაკლი ბურდილაძე ამბობს, რომ „ხრუშჩოვკების“ მცხოვრებლებს მ2-ის სხვა ახალ საცხოვრებელ სახლში გადასვლას შესთავაზებენ, თავად კი ადგილზე ახალ საცხოვრებელ სახლებს ააშენებენ. 

ბურდილაძის ინფორმაციით, მოსახლეობასთან მოალაპარაკებები ჯერ არ დაწყებულა და ეს პროცესი პროექტის დამტკიცების შემდეგ დაიწყება. სამშენებლო კომპანიის ინფორმაციით, მაქსიმუმ 2 თვეში ამ მიმართულებით კონკრეტული ნაბიჯები გადაიდგმება. 

„ჩვენ გვაქვს საპილოტე პროექტი საბურთალოს რაიონში, ვმუშაობთ ამ პროექტის დასრულებაზე. გვინდა, ხრუშჩოვკების მცხოვრებლებს შევთავაზოთ ჩვენს პროექტში ბინების გადაცვლა. ეს იქნება პირველი ნაბიჯი იმისკენ, რომ ეს ბინები ჩანაცვლდეს თანამედროვე სტანდარტების საცხოვრებელი სახლებით. 

საპილოტე პროექტი მოიცავს ქავთარაძის ქუჩაზე მდებარე ობიექტებს. საუბარია 300 ბინაზე. რა თქმა უნდა, 300-ვე ჩვენ ვერ გავცვლით ხრუშჩჩვკებზე. საუბარია დაახლოებით ბინების ერთი-მესამედის გაცვლაზე ხრუშჩოოვკებზე. ეს პროცესი ჯაჭვური რეაქციით გაგრძელდება და ახალაშენებულ ბინებში შევთავაზებთ სხვა ხრუშჩოვკების მცხოვრებლებს“,- აცხადებს ირაკლი ბურდილაძე.

ხრუშჩოვკებთან დაკავშირებით უძრავი ქონების სააგენტო „Myclient.ge“ ერთხელ უკვე წერდა. კომპანიაში მიაჩნიათ, რომ „ვინაიდან ე.წ. ხრუშჩოვკებს დიდი ხნის წინ გაუვიდა ექსპლუატაციის ვადა, მათი ჩანაცვლების პროცესიც ბევრი წლის წინ უნდა დაწყებულიყო“.

 კომპანიის დირექტორის, გვანცა გუჯელაშვილის თქმით, ე.წ. ხრუშჩოვკები, ფაქტობრივად, ამორტიზებულია, რის გამოც ბინის შეძენით დაინტერესებულ მოქალაქეების მხრიდან მათზე მოთხოვნა აღარ არის. 
 

 „ვფიქრობ, მერიამ დროული და ქმედითი ნაბიჯები უნდა გადადგას, რათა რაც შეიძლება, მალე დაიწყოს ეს პროცესი. რა თქმა უნდა, პროცესი ადვილი არ იქნება, მაგრამ ფაქტია, რომ აუცილებელია. ამისთვის, ალბათ მერიას მოუწევს, მოლაპარაკებები აწარმოოს დეველოპერებთან და მათთან კონკრეტულ შეთანხმებას მიაღწიოს. აუცილებელია ასევე ბინის მაცხოვრებლებთან მოლაპარაკებაც, რათა ერთობლივი შეთანხმების საფუძველზე დაიგეგმოს, როგორ წარიმართება ეს პროცედურა, რათა არც სახელმწიფო დაზარალდეს, არც დეველოპერები და არც მოქალაქეები,“-განმარტავს გუჯელაშვილი.

 მისივე თქმით, ამორტიზებული საცხოვრებელი ფართის ჩანაცვლება ახალაშენებული ბინებით, მომავალში უძრავი ქონების ბაზრის განვითარების კუთხით მნიშვნელოვანი ფაქტორია.