სადაზღვევო ინდუსტრიის წარმომადგენლები ადასტურებენ, რომ სამშენებლო კომპანიებისთვის შენობების ფარული დეფექტების სავალდებულო დაზღვევის საკითხზე მთავრობასთან კონსულტაციები ნამდვილად მიმდინარეობს. ეკონომიკის სამინისტროში გამართული შეხვედრიდან ირკვევა, რომ სამშენებლო სექტორს შენობების ფარული დეფექტების დაზღვევის ვალდებულება მაქსიმუმ 10 წლის განმავლობაში ექნება. 

აღნიშნულ სიახლეს უძრავი ქონების სააგენტო „Myclient.ge“ გამოეხმაურა და საკუთარ ხედვას კომპანიის დირექტორი, გვანცა გუჯელაშვილი შემოგთავაზებთ.

რატომ არის საჭირო  სამშენებლო დაზღვევა და კონკრეტულად რა შეიცვლება რეგულაციების ამ კუტხით გამკაცრებით ?

- სამშენებლო დაზღვევის სერვისს განვითარებულ ქვეყნებში უკვე რამდენიმე ათეული წელია, აქტიურად იყენებენ და მათი პრაქტიკიდან გამომდინარე, შემიძლია, ვთქვა, რომ ეს სერვისი მშენებლობის პროცესს ბევრად დაცულსა და სანდოს გახდიდა. სამწუხაროდ, ჩვენთან ჯერ კიდევ ვერ დამკვიდრდა ხარისხზე ორიენტირებულობის ტენდენცია. თუკი სამშენებლო ბიზნესში ჩართული ადამიანები იზრუნებენ და დააზღვევენ მშენებლობის პროცესს, მომხმარებლების წინაშე აღებულ ვალდებულებებს დროულად და მაღალი ხარისხით შეასრულებენ,“-განაცხადა გვანცა გუჯელაშვილმა.

რას შეიძლება, მოიცავდეს სამშენებლო დაზღვევა ? 

 მშენებლობა რთული, კომპლექსური და ძალიან საპასუხისმგებლო პროცესია, სადაც ყოველთვის არსებობს ისეთი რისკების განვითარების საშიშროება, როგორიც არის დასაქმებული პერსონალის ჯანმრთელობის დაზიანება, უხარისხო მასალებით გამოწვეული ზიანი, სამშენებლო პროცესის შეჩერება-შეფერხება, კომპანიის ფინანსური ზარალი და ა.შ. მშენებლობის პროცესში არსებული რისკების განვითარება აზარალებს როგორც თავად სამშენებლო კომპანიას, ისე იქ დასაქმებულ ადამიანებს და რაც მთავარია, აზარალებს კლიენტებს, რომლებმაც შესაძლოა, წლების მანძილზე დაგროვებული დანაზოგი ან ბანკიდან აღებული უზარმაზარი ვალი უძრავი ქონების შეძენაში ჩადო. ამიტომ, კომპანიები ვალდებულები არიან, გაითვალისწინონ და დააზღვიონ თითოეული რისკი, რათა საკუთარ ბიზნესთან ერთად სხვა ადამიანის ინტერესებიც დაიცვა.