ეკონომიკის სამინისტრო კანონპროექტზე მუშაობს, რომლის მიხედვითაც, სამშენებლო კომპანიებს დასრულებული შენობების ფარული დეფექტების დაზღვევის ვალდებულება ექნებათ. 

იმ შემთხვევაში, თუ შენობაში რაიმე კონსტრუქციული ხარვეზი, ან უფრო დიდი პრობლემა აღმოჩნდა, რამაც შენობა ექსპლუატაციაში მიღების შემდეგ საცხოვრებლად უვარგისი გახადა, აღნიშნული დაზღვევის შემდეგ ნაკლის გამოსწორება უნდა მოხდეს. დაახლოებით ასე იკითხება საკანონმდებლო ცვლილებების ის პაკეტი, რასაც ეკონომიკის სამინისტრო ამუშავებს. როგორც მინისტრის მოადგილემ, ირმა ქავთარაძემ განმარტა, დასრულებული შენობების ფარული დეფექტების დაზღვევის კანონპროექტთან დაკავშირებით უწყება კონსულტაციებს გადის როგორც სადაზღვევო ინდუსტრიასთან, ისე სამშენებლო სექტორთან. 

„პასუხისმგებლობის დაზღვევა დღესაც არსებობს და ნებაყოფლობითობის საფუძველზე ნებისმიერ კომპანიას და ნებისმიერ დარგში მომუშავე ექსპერტს შეუძლია, რომ ასეთი სადაზღვევო პროდუქტი შეიძინოს. რაც შეეხება სავალდებულო დაზღვევას, ამის თაობაზე მსჯელობა მიმდინარეობს დარგთან ერთად. მე ვგულისხმობ როგორც სამშენებლო კომპანიებს, ასევე სადაზღვევო კომპანიებს. ასევე ჩვენ ვსწავლობთ სხვა ქვეყნების გამოცდილებას, რომელ ქვეყნებში არსებობს ასეთი სავალდებულო მოთხოვნები, რა გავლენას ახდენს ის სექტორზე და შესაბამისად საჭიროების შემთხვევაში ჩვენ ასეთი რეგულაციების შემოღებაზე გავაგრძელებთ კონსულტაციებს დარგთან, რომ შემოღებულ იქნას ფარული დეფექტებისაგან შენობის პასუხისმგებლობის დაზღვევა. ეს ეხება ფარულ დეფექტებს’’-განმარტა ირმა ქავთარაძემ. 

მისი თქმით, დოკუმენტი საბოლოო სახით მზად სავარაუდიდ წლის ბოლოსთვის იქნება.

წყარო:bm.ge