ეკონომიკის სამინისტრო „შენობა-ნაგებობების ენერგეტიკული მახასიათებლების შესახებ’’ კანონპროექტს ამზადებს, რომელიც ენერგოეფექტიანობის მოთხოვნებს ადგენს. ეკონომიკის მინისტრის მოადგილემ, ირმა ქავთარაძემ, პარლამენტში დარგობრივი ეკონომიკის კომიტეტში გამოსვლისას აღნიშნა, რომ კანონპროექტი ენერგეტიკული გაერთიანების ექსპერტების დახმარებით შემუშავდა, რომელიც ძალაში მომავალი წლის ივნისამდე უნდა შევიდეს. აღნიშნული კანონპროექტით, კანონის ძალაში შესვლისათვის დაახლოებით 9 კანონქვემდებარე აქტი უნდა შემუშავდეს, მათ შორის ისეთები, რომელიც შეეხება მთელი საქართველოს ზონირებას ანუ მოხდება ზონებად დაყოფა ენერგო მოხმარების თვალსაზრისით და კლიმატიდან გამომდინარე. დადგენილი იქნება ნორმები თითოეული ზონისათვის და თითოეულ ზონაში არსებული შენობა უნდა აკმაყოფილებდეს გარკვეულ ნორმებს. რა არის და რა მნიშვნელობა აქვს ენერგოეფექტურობას მსოფლიოსთვის და რაღა თქმა უნდა, საქართველოსთვის? იცოდით, რომ თქვენი, სახლის გათბობას საქართველოში ორჯერ მეტი ენერგია სჭირდება, ვიდრე ასეთივე კლიმატურ პირობებში მდგარი სახლის გათბობას ევროკავშირის ქვეყნებში? რატომ? პასუხი ის არის, რომ ევროკავშირის ქვეყნები დიდ ხანია, გადავიდა სახლის შენება-მოწყობის ენერგოეფექტურ სისტემაზე. საქართველოში კი, ენერგოეფექტურობის თვალსაზრისით საერთო სურათი ფაქტობრივად არ შეცვლილა. უძრავი ქონების სააგენტო „Myclient.ge“-ს დაკვირვებით, საქართველოს მთელ ტერიტორიაზე არსებული შენობების უმრავლესობა, ძალიან დაბალი ეფექტურობით ხასიათდება. მათი დიდი ნაწილი აგებულია ერთმაგი ფანჯრებით, მძიმე ბეტონის გარე კედლებით ან ბლოკით. შესაბამისად ამ შენობების გათბობა-გაგრილებისთვის საქართველოს ენერგომოხმარების მთლიანი რაოდენობის 60% იხარჯება. „რომ გადავხედოთ საქართველოში არსებულ შენობებს, დავასკვნით, რომ ჩვენი ჩენობების კედლები ძალიან თხელია როგორც სითბოსთვის, ისე სიცივისთვის, შესაბამისად, ამ ორივე სეზონზე ძალინ დიდ ენერგიას მოვიხმართ; ზაფხულში, როცა ძალიან ცხელა და სიცხე შენომებშიც ადვილად აღწევს, ბევრი ენერგია გვჭირდება იმისთვის, რომ სახლი გავაგრილოთ. ასევე ხდება ზამთარშიც- როცა გარეთ ცივა, სახლის გასათბობად ანალოგიურად ბევრ ენერტიას ვიყენებთ,“-განმარტავს Myclient.ge-ს დირექტორი, გვანცა გუჯელაშვილი. გარდა იმისა, რომ ენერგოეფექატურობის თვალსაზრისით პრობლემა ძველ, წლების წინ აშენებულ შენობებში, გუჯელაშვილი განმარტავს, რომ სახარბიელო სიტუაცია არც ახლადაშენებულ კორპუსებთან მიმართებაშია. „ჩვენი შენობები, ფაქტობრივად, უსტანდარტოდ შენდება და საჭირო მახასიათებლები უბრალოდ არ კონტროლდება და რაღა თქმა უნდა, რომ ამ საკითხის მოგვარება სასწრაფო და აუცილებელია. მისასალმებელია, რომ ევროკავშირთან ასოცირების შეთანხმებით მაინც ავიღეთ ენერგოეფექტურობის სისტემაზე გადასვლის ვალდებულება. ახლა მთავარია, დროულად მივიღოთ შესაბამისი რეგულაციები, უფრო მთავარი კი ის არის, რომ ნორმები გახდეს ქმედითი და სახელმწიფომ რეალურად უზრუნველყოს შენობების ენერგოეფექტურ სისტემაზე გადასვლა,“-განაცხადა გვანცა გუჯელაშვილმა. განმარტებისთვის, ენერგოეფექტურობა განიხილება როგორც მოხმარებული ენერგიის შემცირება მოცემული მომსახურებისთვის (გათბობა, განათება, ა.შ.) ან საქმიანობისათვის. მოხმარებული ენერგიის შემცირება ზოგადად ასოცირდება ტექნოლოგიურ განვითარებასთან, მაგრამ ეს ყოველთვის ასე არაა, რადგან შემცირება შეიძლება მოხდეს უკეთესი ორგანიზებისა თუ მენეჯმენტის შემთხვევაში ან მოცემულ სექტორში გაუმჯობესებული ეკონომიკური პირობების დროს („არა-ტექნიკური ფაქტორები”). მარტივად რომ ვთქვათ, ენერგოეფექტურობა წარმოების სექტორში უბრალოდ ნიშნავს იმავე რაოდენობის წარმოებას ნაკლები ენერგიის ხარჯვით, ან გაზრდილ წარმოებას ენერგიის იმავე დანახარჯით. რეალურად, მცირდება ერთეული პროდუქციის საწარმოებლად საჭირო ენერგიის რაოდენობა, რაც ზოგავს თანხებს. რაც შეეხება საქართველოს; ენერგოეფექტურობის სისტემაზე გადასვლის ვალდებულება საქართველომ ევროკავშირთან ასოცირების შეთანხმების საფუძველზე აიღო. თავდაპირველად, სახელმწიფომ უნდა მიიღოს შესაბამისი კანონი, რომელიც თითოეული ზონსა და თითოეულ ზონაში არსებული შენობებს დაავალდებულებს, დააკმაყოფილონ გარკვეული ნორმები.