უძრავი ქონების შეძენისას, გარდა იმისა, რომ უნდა ვიფიქროთ მის ფასზე, ადგილმდებარეობაზე, მშენებლობის ხარისხზე,  სამშენებლო კომპანიაზე, მდგომარეობაზე, ასევე ძალიან ყურადსაღები და მნიშვნელოვანი დეტალია მისი ენერგოეფექტურობა. მოგეხსენებათ ჩვენი ოჯახების ყოველთვიურ გასავალს კომუნალური გადასახადები წარმოადგენს, ხარჯების ძირითად ბირთვს კი ელექტროენერგიის და ბუნებრივი აირის გადასახადი წარმოადგენს. ქონების შეძენის დროს  ენერგოეფექტურობის შესახებ მეპატრონეს ან კომპანიას აუცილებლად უნდა ვკითხოთ. იმ შემთხვევაში თუ ფინანსები საკუთარი სახლის აშენების საშუალებას გვაძლევს, უმჯობესია, ის ენერგოეფექტური იყოს, რადგან ერთხელ გაწეული ხარჯი საშუალებას მოგვცემს, მომავალში თანხები დავზოგოთ.

კვლევების თანახმად დაახლოებით 150-180 კვ.მ ფართობის პირობებში, ენერგოეფექტური სახლი ბუნებრივი აირის გადასახადს 30-40%-ით დაგიზოგავთ. თუ გინდათ რომ ენერგოეფექტური სახლი ააშენოთ უნდა გამოიყენოთ ფოლადის კონსტრუქციები, ის უზრუნვეყოფს, როგორც სახლის თბოიზოლაციას ასევე ამარტივებს დაშენებასაც. რკინა-ბეტონის შენობების  ენერგოეფექტურობას სწორად დამონტაჟებული გათბობის სისტემა და სახლის დათბუნება უზრუნველყოფს.

ენერგოეფექტურ სახლს ააშენებთ აგურის და პერლიტის მეშვეობითაც, მოგეხსენებათ აგურის სახლი ბეტონის სახლზე ბევრად თბილია, განსაკუთრებულ ეფექტს მიიღებთ, თუ აგურით ნაშენებ სახლს თიხით გალესავთ, მიიღებთ როგორც,  ენერგოეფექტურ მშენებლობას, ასევე თქვენი სახლი ბუნებრივი და ეკოლოგიურად სუფთა მასალისგან იქნება აშენებული.

რაც შეეხება პერლიტს ის-ეკოლოგიურად სუფთა სტერილური მასალაა. არ იწვევს ალერგიულ რეაქციას და კანის გაღიზიანებას, ორთქლის შეღწევადობის თვისების გამო კონსტრუქცია „სუნთქავს”, იდეალური თბო-ბგერათსაიზოლაციო მასალაა, ზრდის კონსტრუქციის ცეცხლმდეგობას, აქვს მცირე მოცულობითი წონა, შესაბამისად მინიმალური დატვირთვა კონსტრუქციებზე, არ ლპება, არ ზიანდება მწერების და მღრღნელების მიერ, ხანგამძლე  და ეკონომიურია, არეგულირებს მიკროკლიმატს შენობაში. 80%-მდე ამცირებს სითბოს დანაკარგებს კედლებიდან,რაც საშუალებას იძლევა 40-60%-ით შემცირდეს გათბობა-გაგრილების ენერგეტიკული დანაკარგები.

კორპუსებს, ძირითადად გაზობეტონით აშენებენ, ის ზამთარში სითბოს ინარჩუნებს და დაახლოებით, 23%-ით ენერგოეფქტურია.