მას შემდეგ, რაც საცხოვრებელი კორპუსების მშენებლობა ასე აქტიურად მიმდინარეობს, გამოიკვეთა ერთი საინტერესო ტენდენცია - მოქალაქეები პატარა ზომის ბინების შეძენას ანიჭებენ უპირატესობას.  ასეთ ტენდენციას კი, დეველოპერები და უძრავი ქონების სააგენტოს ბროკერები მოსახლეობის ფინანსურ მდგომარეობას უკავშირებენ. 

MYclient.ge-ს ბროკერების განმარტებით,  მსგავსი საცხოვრებლის  ყიდვა, გაკეთება და მოწყობა, შედარებით, ნაკლებ თანხებთანაა დაკავშირებული, ამიტომ ახლადშექმნილი ოჯახები უპირატესობას, სწორედ ასეთ ბინებს ანიჭებენ. თუმცა, პატარა ფართში ოთახების სწორად და ფუნქციონალურად განაწილება დიდი პრობლემაა, ამიტომ რამდენიმე ფაქტორი უნდა გაითვალისწინოთ.

-აუცილებლად ცალკე ოთახად გამოყავით საძინებელი, ის იქნება პატარა ზომის, მაგრამ იზოლირებული, ასე მეტად კომფორტულად იგრძნობთ თავს. ბევრი შეცდომას უშვებს და მისაღებს და საძინებელს ერთად აკეთებს, შემდეგ ფარდით ტიხრავს, ასეთი მოწყობა ძალიან მოუხერხებელია.

-პატარა ფართის საცხოვრებელ სახლში ე.წ „სტუდიოს“ ტიპის მისაღები და სამზარეულო ამართლებს. სამზარეულოს და მისაღები/სასადილოს გამოყოფა ე.წ ბარით შეგიძლიათ. ცალკე სამზარეულო და ცალკე მისაღები ძალიან პატარა გამოვა და არაკომფორტული იქნება, მათი გაერთიანება კი სივრცეს მოგცემთ.  ამ შემთხვევაში პრობლემას სამზარეულოდან გამოსული სუნი ქმნის.

-  შეგიძლიათ შემოსასვლელი და სამზარეულო ერთმანეთისგან პატარა  ღია თაროებით გამოყოთ, ასე მეტად მოსახერხებელია, ვიდრე ცალკე ამოშენებული ვიწრო შემოსასვლელი, ანდაც პირდაპირ სამზარეულოში შემომავალი მთავარი კარი.

- რაც შეეხება აბაზანას, ამ შემთხვევაში, აუცილებლად,  პატარა  საშხაპე და პატარა ნიჟარა უნდა დადგათ. ასევე ამართლებს კედლის თაროებიც, რადგან დიდი ზომის ავეჯი, თქვენს ისედაც პატარა აბაზანას, მეტად დააპატარავებს.

- სახლის გაკეთების დროს ეცადეთ,მაქსიმალურად, ღია ფერები გამოიყენოთ, ასე თქვენ სივრცის ილუზიას შექმნით. ნუ გადატვირთავთ კედლებს ზედმეტი აქსესუარებით.

-ავეჯიც, რა თქმა უნდა, მაქსიმალურად კომფორტული და ფუნქციონალური უნდა იყოს, თუ შესაძლებლობა გექნებათ, ისეთი ავეჯი შეიძინეთ, რომელმებიც იშლება და სხვადასხვა ზომის ხდება, მაგალითად, შეიძინეთ ჟურნალების პატარა მაგიდა, რომელიც იშლება და დიდი სასადილო მაგიდა ხდება.

-აივანზე პატარა ზომის სათავსო და რკინის თაროები გააკეთეთ ყვავილებისთვის.