უახლოეს მომავალში მშენებლობის მოსაკრებელი არა დაკავებული მიწის ფართის, არამედ, შენობის საერთო ფართის მიხედვით დაითვლება. ცვლილება „ადგილობრივი მოსაკრებლების შესახებ“ კანონში შედის. ცვლილებების პაკეტი პარლამენტს თბილისის მერიის არქიტექტურის სამსახურმა გადაუგზავნა. 
 

უწყების ინფორმაციით, აქამდე კვ.მ-ზე დაწესებული 1 ლარის მოსაკრებლის ნაცვლად დაწესდება ღირებულების „ზედა ჭერი“ – 4 ლარი. თითოეული მუნიციპალიტეტი კი კონკრეტულ განაკვეთს თავად განსაზღვრავს, იმის მიხედვით თუ რა დანახარჯები აქვს ადმინისტრირების პროცესში. 

„აქამდე იყო არც თუ ის კარგად, იანგარიშებოდა მოშენების ფართობის მიხედვით კვ.მ.-ზე 1 ლარი. ანუ შეიძლებოდა შენობა ყოფილიყო 10 სართულიანი და მოსაკრებელი ითვლებოდა მხოლოდ და მხოლოდ იმ ფართობის გათვალისწინებით, რა ფართობის მიწაზეც შენობა იდგა, ანუ დაკავებული მიწის ნაკვეთის მიხედვით. სანებრთვო მოსაკრებელი უნდა ფარავდეს ადმინისტრაციულ დანახარჯს. ამას არ გააჩნია ფისკალური ეფექტი, ეს არ არის გადასახადი, ეს არის მოსაკრებელი, რომლის ბუნებაც არის დაფაროს ადმინისტრაციული დანახარჯები. კანონით აქამდე განსაზღვრული თანხა არ არის იმის შესაბამისი, რა ადმინისტრაციულ ხაჯებსაც ეწევა მუნიციპალიტეტი სამი ეტაპის დროს - ეს არის მშენებლობის ნებართვის გაცემის პროცესი, მშენებლობის მიმდინარეობის დროს ინსპექტირების პროცესი და აშენებული შენობა-ნაგებობების ექსპლუატაციაში მიღები ეტაპი.“ - განაცხადა თბილისის მერიის არქიტექტურის სამსახურის უფროსმა თემურ ბოლოთაშვილმა.

წყარო: bm.ge