2018 წლის პირველ კვარტალში უძრავი ქონების გაყიდვების ჯამურმა რაოდენობამ 27 495 ერთეული შეადგინა, რაც გასული წლის იგივე პერიოდის მონაცემებს 27%-ით აღემატება. უძრავი ქონების ბაზრის რეგულარული კვლევა თიბისი ბანკის, ISET-ის კვლევითი ინსტიტუტისა და JumpStart-ის ერთობლივი პროექტის უძრავი ქონების ლაბორატორიის (REM lab) ფარგლებში ტარდება. 

„უძრავი ქონების ბაზრის ზრდაში მნიშვნელოვანი წვლილი კვლავ თბილისის უძრავი ქონების ბაზრის გააქტიურებას უკავია. პირველ კვარტალში თბილისში უძრავი ქონების გაყიდვების წლიურმა ზრდამ 37.1% შეადგინა, მაშინ როდესაც თბილისის გარეთ უძრავი ქონების გაყიდვები 21.0%-ით არის გაზრდილი. უძრავი ქონების გაყიდვების კუთხით, პირველი კვარტალი განსაკუთრებით აქტიური გამოდგა რაჭა-ლეჩხუმი ქვემო სვანეთისათვის (წლიური ზრდის ტემპი 105.0%) , გურიისა (66.9%) და კახეთისათვის (31.7%).“ - ნათქვამია კვლევის დოკუმენტში. 

კვარტალური კვლევა აჩვენებს, რომ 2018 წლის პირველ კვარტალში, წინა კვარტალთან შედარებით, გაზრდილია საცხოვრებელი უძრავი ქონების როგორც გაყიდვის (5.1%), ისე გაქირავების ფასის (1.4%) ინდექსი. აღნიშნულ პერიოდში, 1 კვ.მ. საცხოვრებელი უძრავი ქონების გაყიდვის საშუალო ფასი 860 აშშ დოლარსა და 906 აშშ დოლარს შორის მერყეობდა, გაქირავების საშუალო ფასი კი 1 კვ.მ-ზე 6.7 აშშ დოლარსა და 7.7 აშშ დოლარს შორის იყო. 

ფასთა ცვლილება დაფიქსირდა კომერციული უძრავი ქონების ბაზაზეც. სამი კვარტლის განმავლობაში სტაბილური შემცირების შემდეგ, 2018 წლის პირველ კვარტალში, კომერციული უძრავი ქონების გაყიდვების ფასის ინდექსი გაიზარდა 12.2%-ით, წინა კვარტალთან შედარებით, გაქირავების ფასის ინდექსი კი ისევ კლებას განაგრძობს. აღნიშნულ პერიოდში, 1 კვ.მ. კომერციული უძ¬რავი ქონების გაყიდვის საშუალო ფასი 1,099 აშშ დოლარსა და 1,182 აშშ დოლარს შორის მერყეობს, ხოლო გაქირავების საშუალო ფასი – 8.7 აშშ დოლარსა და 9.6 აშშ დოლარს შორის.