საქსტატის ფასების სტატისტიკის სამმართველოს უფროსის გიორგი თეთრაულის ინფორმაციით, სამომავლოდ უწყება მშენებლობის ღირებულების ინდექსის სრულყოფას და მასში ახალი კომპონენტების დამატებას გეგმავს. 

"პირველ ეტაპზე მშენებლობის რესურსების ფასების ინდექსს ვაკვირდებით, შემდგომში ვაპირებთ ჩავრთოთ სხვა კომპონენტებიც, როგორიცაა მიწის ფასი, საინჟინრო და არქიტექტორული მომსახურების ღირებულება, სათაო ოფისის ხაჯები და ასე შემდეგ. სხვადასხვა კომპონენტების ჩართვით უფრო მივუახლოვდებით უძრავი ქონების საბაზრო ფასს, ვაპირებთ ინდექსი უფრო განვავრცოთ", - განაცხადა  თეთრაულმა. 

შეგახსენებთ, რომ საქსტატმა მშენებლობის ღირებულების ინდექსი პირველად გამოაქვეყნა, რომელიც 5 კომპონენტს აერთიანებს. ესენია: მასალების და ნედლეულის ღირებულება, ხელფასების ხარჯი, მანქანა-დანადგარების ხარჯი, სატრანსპორტო, საწვავის და ელექტროენერგიის ხარჯები და ცალკე კომპონენტი- სხვა ხარჯები. ინდექსი მრავალსართულიანი საცხოვრებელი სახლის მშენებლობისათვის საჭირო რესურსების ფასების დინამიკას განსაზღვრავს. გამოქვეყნებული მონაცემებით, მიმდინარე წლის პირველ კვარტალში, წინა კვარტალთან შედარებით 5,6%-ითაა შემცირებული.