პროცედურები, რომელიც მიწის რეგისტრაციას უკავშირდება კიდევ უფრო გამარტივდება, - ამის შესახებ საჯარო რეესტრის იურიდიული დეპარტამენტის, ადმინისტრაციული წარმოების სამსახურის უფროსმა, ვახტანგ ბოხაშვილმა განაცხადა. მისი თქმით, აღიარების კანონში შევა ცვლილებები, რომელიც გაამარტივებს ცარიელ, ე.წ. მამა-პაპისეულ მიწის ნაკვეთებზე საკუთრების უფლების აღიარების პროცედურას. ამის შესახებ პარლამენტმა უკვე იმსჯელა. 

"2019 წლის პირველ იანვრამდე გაგრძელდა კანონის მოქმედება, მაგრამ 1 იანვარს ეს კანონი არ შეწყვეტს არსებობას. კერძოდ, დარჩება მუდმივმოქმედი მუხლები, ის რეგულაციები, რომელმაც კარგად იმუშავა და გაამართლა. ჩვენ ასევე ვფიქრობთ საკანონმდებლო რეგულაციის უფრო გამარტივებაზე. თუ დღევანდელი მდგომარეობით პირს არ აქვს უფლების დამდგენი დოკუმენტი და ეს დოკუმენტი საჯარო რეესტრმაც ვერ მოიძია, საქმე გადაეგზავნება მუნიციპალიტეტის აღიარების კომისიას. ამჟამად კომისია გარკვეული პირობებით არის შეზღუდული, კერძოდ, მიწის ნაკვეთზე უნდა იდგეს შენობა-ნაგებობა, ან უნდა იყოს, უკვე კერძო საკუთრებაში არსებული მიწის ნაკვეთის მომიჯნავე. პრაქტიკამ აჩვენა, რომ იმ მოქალაქეების რიცხვი, ვინც ამ კრიტერიუმებს ვერ აკმაყოფილებენ, საკმაოდ ბევრია. ამიტომ, საპარლამენტო მოსმენების დროს გაცხადებული იქნა იმის შესახებ, რომ აღიარების კანონში ცვლილებები შევა, რომელიც გაამარტივებს მიწის ნაკვეთებზე საკუთრების უფლების აღიარების პროცედურას", - განაცხადა ვახტანგ ბოხაშვილმა. 

მისივე განმარტებით, ამ ცვლილების თანახმად, მიწის ნაკვეთის დამტკიცებისას აღიარების კომისიას მეტი უფლებები მიეცემა. 

"ცვლილებით აღიარების კომისისას მიეცემა უფლება , რომ ცარიელი მიწის ნაკვეთები დააკანონოს, თუ დადგინდება, რომ წლების განმავლობაში ის კონკრეტულ პირების საკუთრებაში იყო. აღიარების კომისია ვალდებულია, ამ მიზნით ადგილზე გავიდეს და საკითხი დეტალურად შეისწავლოს. მეზობლების გამოკითხვით და სხვადასხვა მექანიზმებით დაადგინოს, რომ მიწის ნაკვეთი, ათეული წლების განმავლობაში, კონკრეტული პირის, ან მისი ოჯახის მფლობელობაში იმყოფება" - განაცხადა ვახტანგ ბოხაშვილმა.

წყარო: bm.ge