გარემოს ეროვნული სააგენტოს მონაცემების მიხედვით თბილისის იმ უბნებს შორის, სადაც ჰაერის დაბინძურების ხარისხი იზომება, ვაშლიჯვარში ყველაზე სუფთა ჰაერია. 
თბილისში ატმოსფერული ჰაერის დაბინძურების მონიტორინგი ავტომატური სადგურების საშუალებით წარმოებს. სადგურები განთავსებულია წერეთლისა და ყაზბეგის გამზირებზე და ვარკეთილში. გარდა ამისა, გაზომვები ტარდება ვაშლიჯვარში განთავსებული მობილური სადგურის საშუალებით. უწყვეტ რეჟიმში მიმდინარეობს ატმოსფერულ ჰაერში შემდეგი რვა დამაბინძურებელი ნივთიერების კონცენტრაციების განსაზღვრა: მყარი შეწონილი ნაწილაკები (PM10, PM2,5), აზოტის ოქსიდები (NO, NOx, NO2), გოგირდის დიოქსიდი (SO2), ნახშირჟანგი (CO), ოზონი (O3). 

„ივნისის მონაცემების მიხედვით წერეთლის გამზირზე გოგირდის დიოქსიდის, აზოტის ოქსიდის, ოზონისა და ნახშირჟანგის საშუალო თვიური კონცენტრაციები ნორმის ფარგლებში იყო და მხოლოდ აზოტის დიოქსიდის საშუალო თვიური კონცენტრაცია აღემატებოდა ზღვრულად დასაშვებ კონცენტრაციას. ყაზბეგის გამზირზე ნახშირჟანგის, აზოტის ოქსიდის, აზოტის დიოქსიდის და გოგირდის დიოქსიდის საშუალო თვიური კონცენტრაციები ნორმის ფარგლებში იყო და მხოლოდ ოზონის საშუალო თვიური კონცენტრაცია აღემატებოდა შესაბამის ზღვრულად დასაშვებ კონცენტრაციას. ვარკეთილში აზოტის ოქსიდისა და დიოქსიდის, გოგირდის დიოქსიდისა და ნახშირჟანგის საშუალო თვიური კონცენტრაციები ნორმის ფარგლებში იყო და აქაც მხოლოდ ოზონის საშუალო თვიური კონცენტრაცია აღემატებოდა შესაბამის ზღვრულად დასაშვებ კონცენტრაციას. ვაშლიჯვარში ივნისის თვის მონაცემებით ყველა განსაზღვრული ნივთიერების შემცველობა დადგენილი ნორმის ფარგლებში იყო", - ნათქვამია BM.GE-ის მიერ გარემოს ეროვნული სააგენტოდან მოპოვებულ განცხადებაში. 

სპეციალისტებმა წერეთლის გამზირზე, ყაზბეგის გამზირსა და ვარკეთილში განსაზღვრული PM10-ის შემცველობა ევროკავშირის მიერ დადგენილ 24 საათიან ნორმას შეადარეს. დადგინდა, რომ წერეთლის გამზირზე ნორმას აღემატებოდა 10 დღის მონაცემი და მისი ყველაზე მაღალი კონცენტრაცია დაფიქსირდა 22 ივნისს - 0.059 მგ/მ3, რაც აღემატებოდა დასაშვებ მნიშვნელობას 1,2-ჯერ. ყაზბეგის გამზირზე PM10-ის შემცველობა ნორმას უმნიშვნელოდ აღემატებოდა მხოლოდ ერთი დღის განმავლობაში - 30 ივნისს. ვარკეთილსა და ვაშლიჯვარში PM10-ის შემცველობის ნორმაზე გადაჭარბების არცერთი შემთხვევა არ დაფიქსირებულა.

წყარო: bm.ge