“პასუხისმგებლიანი დაკრედიტების” წესის ამოქმედებამდე ანუ პირველ იანვრამდე, საქართველოს ათასობით მოქალაქემ გააფორმა იპოთეკური სესხები, რადგანაც მათ 1 იანვრის შემდეგ, ამ სესხების აღება მნიშვნელოვნად შეეზღუდებოდათ. დღეს გამოქვეყნებული სტატისტიკის მიხედვით, 2018 წლის დეკემბერში საქართველოში იპოთეკური სესხების გაცემის ტემპი მთელი 36.7%-ით გაიზარდა. 

მთლიანობაში 2018 წლის დეკემბერში საბანკო სექტორის დაკრედიტების ზრდამ წინა წლის ანალოგიურ პერიოდთან შედარებით 17.2% შეადგინა. აქედან ბიზნეს სექტორის სესხები 16%-ით, მცირე ბიზნესის სესხები 21%-ით, ხოლო სამომხმარებლო სესხები 16%-ით გაიზარდა. 

საქართველოს ეროვნული ბანკის პრეზიდენტის, კობა გვენეტაძის განცხადებით, დაკრედიტების ეს ტემპი არაჯანსაღად მაღალია. სწორედ ეს იყო ერთ-ერთი მიზეზი, რის გამოც ეროვნულმა ბანკმა ფიზიკურ პირებზე სესხების გაცემის წესი შეცვალა და “პასუხისმგებლიანი დაკრედიტების” სისტემა შემოიღო. გვენეტაძის თქმით, ჯერ-ჯერობით ახალი წესის შედეგებზე საუბარი ნაადრევია, თუმცა სებ-ის მოლოდინით, მან სესხების ზრდა დაახლოებით 10-15%-მდე უნდა შეამციროს. სწორედ ეს მაჩვენებელი მიაჩნია ეროვნულ ბანკს მდგრად დონედ. 

“ვფიქრობთ, რომ 18-20% არის უფრო მაღალი, ვიდრე ჩვენი შეფასებით იქნებოდა მდგრადი ზრდა. მდგრადი ზრდა უნდა იყოს 10-15%-ის ოდენობით. ის ზრდა, რომელიც არის სასეხო პორტფელის, არის იმაზე მაღალი, ვიდრე ფუნდამენტური ფაქტორები განაპირობებენ, ის ფუნდამენტური ფაქტორები, რომლებიც დღეს საქართველოშია. აქედან გამომდინარე ვფიქრობთ, რომ ის შედარებით უფრო ზომიერი უნდა იყოს,”- ამბობს გვენეტაძე.