თბილისის მიწათსარგებლობის გენერალური გეგმის ავტორი კომპანიის,„სითი ინსტიტუტი–საქართველოს" დირექტორის მამუკა სალუქვაძის განცხადებით, გენგეგმის პრაქტიკაში განხორციელების შედეგად, „ჩვენ სხვანაირ ქალაქს მივიღებთ". 

მისი განცხადებით, ურბანული დაგეგმარების, არქიტექტურულმა და სხვა სამსახურებმა სწორედ ამ დოკუმენტით უნდა იხელმძღვანელონ. 

"მომავალში ჩვენ მივიღებთ სხვანაირ ქალაქს, რომელიც გარკვეული ჩამოყალიბებული იდეოლოგიით იქნება განვითარებული და არა – ასეთი ქაოტური. ეს იდეოლოგია არის ის კონცეფცია, რომელიც ჩვენ შევთავაზეთ მერიას – კომპაქტური, მწვანე ქალაქი, კარგად შეკავშირებული და ქმედითი ქალაქი", - განაცხადა სალუქვაძემ. 

გადაცემაში საუბრისას მან აღნიშნა, რომ "კარგად შეკავშირებული ქალაქი" ითვალისწინებს როგორც უზრუნველყოფილ საზოგადოებრივი ტრანსპორტს, ასევე ინფრასტუქტურის განვითარებას. 

სალუქვაძის თქმით, გადაადგილების მხრივ, გენგეგმა უპირატესობას ფეხით მოსიარულეს ანიჭებს, შემდეგში – ველოსიპედით, ხოლო ბოლოს კერძო მანქანით მოსიარულეს. მისი განცხადებით, თითქმის ყველა ქუჩა უზრუნველყოფილი იქნება ველოსიპედის გზებით. 

"რა თქმა უნდა, ძალიან რთულად წავა პროცესები და ყველაფერი ერთი ხელის მოსმით არ გაკეთდება, მაგრამ ჩვენ ვფიქრობთ, რომ სწორედ მიწოდებული ის კონცეფცია და ის იდეოლოგია, რომელიც ქალაქმა მიიღო და მოიწონა, დაგვეხმარება, რომ ქალაქმა სხვანაირი ცხოვრებით იცხოვროს. ევროპული ქალაქები რომ მოგვწონს და კარგად რომ ვგრძნობთ ხოლმე თავს, ასეთი გარემო უნდა შევქმნათ", - აღნიშნა მამუკა სალუქვაძემ. 

გარდა ამისა, სალუქვაძე ამბობს, რომ გარკვეული ტერიტორიების ათვისებასთან დაკავშირებით კონკურსები და ტენდერები ჩატარდება, იმ შემთხვევაში კი, თუ ინვესტორები არ დაინტერესდებიან, შესაძლოა, მერიამ კერძო სექტორს მათზე უფრო მეტად მორგებული წინადადებები შესთავაზოს. 

"ჩვენით მოვნიშნეთ დაახლოებით, 40-50 ჰექტარი ფართობის პოლიცენტრული არეალებიც, თბილისის თანაბარი განვითარებისთვის. ეს არის დიდი საცხოვრებელი კვარტლების მიმდებარედ არსებულ მაგისტრალებთან ტერიტორიები, როგორებიც არის: დიდი დიღომი, გლდანი, „ისთ ფოინთთან“, სამგორისკენ და ა.შ. ეს ის ტერიტორიებია, რომელთა განვითარებაც შეიძლება და ისინი ამას საჭიროებენ", - აცხადებს მამუკა სალუქვაძე. 

მისივე თქმით, კერძო სექტორის ამ ლოკაციებით დაინტერესების მიზეზი არის ის, რომ "ინვესტორებისთვის ნებართვები მთის ფერდობებზე მშენებლობებისთვის აღარ გაიცემა და ამ შეზღუდვებიდან გამომდინარე, ისინი პერიფერიებისკენ გადაინაცვლებენ".