დღეს თბილისის საკრებულო ახალ გენერალურ გეგმას დაამტკიცებს, ამის შესახებ კახა კალაძემ საკრებულოს სხდომის დაწყებამდე განაცხადა. კალაძის თქმით, ახალი გენერალური გეგმა თბილისის გრძელვადიანი განვითარების სამოქმედო დოკუმენტი იქნება. 

"დღეიდან თბილიის ექნება ახალი გენერალური გეგმა, ეს იქნება დედაქალაქის განვითარების ახალი სახელმძღვანელო. დღეს საკრებულო ამ დოკუმენტის მიღებით უზრუნველყოფს დედაქალაქის სწორ და გრძელვადიან განვითარებას. თბილისის მიწათმოწყობის გენერალურ გეგმაზე ჩვენ ყველა ერთად ვმუშაობდით, ავტორები, დარგის სპეციალისტები, რისთვისაც თითოეულ ამ ადამიანს მინდა ძალიან დიდი მადლობა გადავუხადო. 

ქალაქში უამრავი პრობლემა დაგვიგროვდა, ქაოტური განაშენიანება, რთული ეკოლოგიური პრობლემები, საცობები, საზოგადოებრივი ტრანსპორტის გაუმართავი ინფრასტრუქტურა და ასე შემდეგ. თუმცა, ყველაზე მთავარი რაც ამ პრობლემათა სათავეა, ქალაქის განვითარების სისტემური ხედვისა და ერთიანი გეგმის არარსებობა იყო,"- განაცხადა კალაძემ.