ყველაზე ძვირი უბნის სტატუსს მთაწმინდა და ვაკე ინარჩუნებს, ამ უბნებში უძრავი ქონება მნიშვნელოვნად ძვირი ღირს, ვიდრე სხვაგან - ამის შესახებ აღნიშნულია „თიბისი კაპიტალის“ მიერ ჩატარებულ უძრავი ქონების ბაზრის კვლევაში. ამავე კვლევის მიხედვით, გლდანში, სამგორში, დიდ დიღომსა და ნაძალადევში უძრავი ქონება შედარებით ხელმისაწვდომ ფასებში იყიდება.

კვლევის მიხედვით, 2018 წელს მთაწმინდაზე ახალაშენებულ ბინებში ერთი კვადრატული მეტრის ფასი 1100-1200 დოლარის ფარგლებში მერყეობდა. სიძვირის მიხედვით მეორე ადგილზეა ვაკე, აქ ერთი კვადრატული მეტრის ფასი 1000-1100 დოლარის ფარგლებშია. სამეულში შედის საბურთალო, სადაც კვადრატული მეტრის შეძენა 900-1000 დოლარად არის შესაძლებელი.

კვლევის მიხედვით, მშენებარე კორპუსებში 700-800 დოლარის ფარგლებში მერყეობს კვადრატული მეტრის ფასები კრწანისში, დაახლოებით ამ ფასად არის შესაძლებელი დიდუბეში, ჩუღურეთსა და ისნის რაოინებში. 600 დოლარზე ცოტა ძვირი ღირს კვადრატული მეტრი ნაძალადევის რაიონში მდებარე ახალაშენებულ კორპუსებში. „თიბისი კაპიტალის“ კვლევის მიხედვით, 2018 წელს 600 დოლარი ღირდა კვადრატული მეტრი სამგორში, დიდ დიღომსა და გლდანში.

რაც შეეხება მეორადი უძრავი ქონების ფასებს, კვლევის მიხედვით ყველაზე ძვირია ბინები ვაკეში, აქ 2018 წელს ერთი კვადრატული მეტრის ფასი 900-100 დოლარი ღირდა. 900 დოლარი ღირდა კვადრატული მეტრი მთაწმინდაზე. 800 დოლარი ღირდა ერთი კვადრატული მეტრი საბურთალოზე, დიდუბეში კი ძველ კორპუსებში ერთი კვადრატული მეტრის შეძენა 700-800 დოლარად იყო შესაძლებელი. ამავე კვლევის მიხედვით, 700 დოლარად იყო შესაძლებელი კვადრატული მეტრის შეძენა კრწანისსა და ჩუღურეთში. 600-700 დოლარი ღირდა კვადრატული მეტრი ისანსა და გლდანში; ნაძალადევში, სამგორსა და დიდ დიღომში კი მეორად ბინებში ერთი კვადრატული მეტრი 600 დოლარი იყო.