„2019 წლის პირველი 2 თვის მონაცემებით, უძრავი ქონების ტრანზაქციებში ვარდნაა“ - ეს განცხადება „საქმიანი დილის“ ეთერში თიბისი ბანკის უძრავი ქონების კორპორატიული დირექტორის მოადგილემ გიორგი დარჩაშვილმა გააკეთა. თუმცა, დარჩაშვილი ვარაუდობს, რომ მდგომარეობა საშუალო და გრძელვადიან პერიოდში გაჯანსაღდება. 

„შარშან უპრეცენდენტოდ მაღალი ტრანზაქციები დაფიქსრიდა, დაახლოებით 35 ათასი ერთეული ბინა გაიყიდა, რაც წინა წელთან შედარებით 31%-იანი ზრდა იყო. ოპერაციების განსაკუთრებული ზრდა ბოლო კვარტალში შეინიშნებოდა, რაც მოსალოდნელ რეგულაციებთან იყო კავშირში. 

რაც შეეხება 2019 წლის პირველ ორ თვეს, უკვე შეინიშნება ახალი იპოთეკური სესხების გარკვეული ვარდნა, თუმცა, კარგი ანალიტიკისთვის უნდა დაველოდოთ რამდენიმე თვეს და შემდეგ შედარდეს წინა წლის მონაცემებს. 

რაც შეეხება მოლოდინებს, გვჯერა, რომ ზრდა მაინც იქნება სექტორში, დაახლოებით 18%-ით სამი წლის განმავლობაში, რაც ჯანმრთელი ზრდაა და რაც აუცილებლად გადაითარგმნება მოთხოვნაში”, - განაცხადა დარჩაშვილმა. 

თიბისი ბანკის უძრავის კორპორატიული დირექტორის მოადგილემ ალტერნატიული პროექტების შექმნაზეც ისაუბრა და აღნიშნა რომ გადაწყობაზე მორგება აუცილებლად მოხერხდება. 

„ახალი რეგულაციით შეიზღუდა არსებული გაყიდვის არხები, თუმცა, გადაჭრით იმის თქმა, რომ დეველოპერებს უკვე პრობლემა აქვთ, ჯერ ასე არ ჩანს. დეველოპერები აუცილებლად იპოვიან და ბანკიც დაეხმარებიან მათ ამაში, რომ ალტერნატიული პროექტი შევთავაზოთ, ეს შეიძლება იყოს განვადების დაფინასება და სხვა“, - განაცხადა გიორგი დარჩაშვილმა.