თბილისის მერიის მიერ შექმნილ პორტალზე - “შენი იდეა ქალაქის მერს” ხმათა სათანადო რაოდენობა დააგროვა პროექტმა, რომელიც დედაქალაქში საბჭოთა პერიოდის ტიპიური კორპუსების ფასადების მოპირკეთებას და მათ გამწვანებას ითვალისწინებს. 

მარიამ მენაბდის მიერ წარდგენილი პროექტი მოიცავს ე.წ. “ხრუშჩოვკების” სახეცვლილებას, რომელთა ფასადიც ქალაქის ცენტრალურ ქუჩებზე გამოდის და მას ამახინჯებს. 

პროექტის ავტორის წინადადების მიხედვით, ფასადი მუშავდება პანელური სქემით, რაც იმას გულისხმობს, რომ არ ხდება შენობის კონსტრუქციის დარღვევა და ფასადი მონტაჟდება უშუალოდ უკვე არსებულ შენობაზე, შესაბამისად მოსახლეობას არ მოუწევს საცხოვრებლის დატოვება, ფასადის რეკონსტრუქციის პროცესში.

პროექტის მიხედვით, შენობების ფასადის მოპირკეთება თბოიზოლაციური პანელებით მოხდება, რაც კორპუსის მაცხოვრებლებს გათბობისა და გაგრილების დანახარჯებს შეუმცირებს. 

მარიამ მენაბდის წინადადებამ 2500 მხარდაჭერა მოიპოვა. ხმათა მოპოვებიდან 10 სამუშაო დღის ვადაში თბილისის მერმა უნდა მიიღოს გადაწყვეტილება იდეის განხილვის გაგრძელების, ან იდეის დაკმაყოფილებაზე უარის თაობაზე. 

თუ მერია აღნიშნული იდეის შემდგომი განხილვის თაობაზე მიიღებს გადაწყვეტილებას, მაშინ 60 კალენდარული დღის განმავლობაში მერი, შესაბამის სტრუქტურულ ერთეულებთან, ტერიტორიულ ორგანოებთან და მერიის მიერ დაფუძნებულ იურიდიულ პირებთან ერთად განიხილავს იდეის განხორციელების შესაძლებლობას. 

მერიის ვებგვერდზე განთავსებულ პრეზენტაციას თან აღნიშნული პროექტის შესაბამისი ხარჯთაღრიცხვა არ ახლავს.