„ ქალაქის ცენტრში განაშენიანების განვითარებას აზრი არ აქვს, ასეთი ტერიტორიები პერიფერიებისკენ გვაქვს მონიშნული“, - ამის შესახებ დედაქალაქის გენგეგმაზე მომუშავე ჯგუფის „სითი ინსტიტუტ საქართველოს“ ერთ-ერთი დამფუძნებელმა, მამუკა სალუქვაძემ განაცხადა.

როგორც მან აღნიშნა, თბილისის მიწათსარგებლობის გენერალური გეგმის საჯარო განხილვები მიმდინარეობს, მათ შორის, პროცესში ჩართულები არიან სპეციალისტები, ახალგაზრდები.

მამუკა სალუქვაძის ვარაუდით გენ.გეგმა 20 სექტემბრისთვის დამტკიცდება.

„სავარაუდოდ, აგვისტოს ბოლომდე განხილვების შედეგად შენიშვნებს ველოდებით. თუ შენიშვნები მისაღები  იქნება, კორექტირებას განავახორიცელებთ. აგვისტოს ბოლოს უკვე შესაძლებელი იქნება, რომ გენ.გეგმის საბოლოო ვარიანტი საკრებულოში განსახილველად და დასამტკიცებლად შევიდეს. 20 სექტემბრისთვის ვვარაუდობთ, რომ დამტკიცდება“, - აღნიშნა სალუქვაძემ.

მისი თქმით, გენ.გეგმაზე მუშაობის დროს, ბერლინის მაგალითი იქნა აღებული: „გერმანელი, ფრანგი არქიტექტორების შეხედულებები გავითვალისწინეთ. ბერლინის მაგალითი თვალსაჩინოდ გვაქვს აღებული. ასევე, შტუტგარდის, მიუნხენის, სტრატბურგის მაგალითები“.

ამასთან, მამუკა სალუქვაძის განმარტებით, ქალაქის ცენტრში განაშენიანების განვითარებას აზრი არ აქვს და ეს გენ.გეგმის მიხედვით, პერიფერიებში უნდა მოხდეს.

„გეგმა დეველოპერებისთვის განსაზღვრავს იმ ტერიტორიებს, რომლებიც მომავალში იქნება ასათვისებელი, სადაც შეიძლება განაშენიანების ინტენსივობის გაზრდა. ბიზნესმა უნდა გაიგოს ვექტორი რა მიმართულებით იხრება. ძირითადად ასეთი ტერიტორიები მონიშნული გვაქვს პერიფერიებისკენ იმიტომ, რომ ქალაქის ცენტრში განაშენიანების განვითარებას აზრი არ აქვს. პრაქტიკულად, ორ სახლს შორის მესამე სახლის მშენებლობა მიმდინარეობს. ექვსი მილიონი კვადტრატული მეტრი საცხოვრებელი არის ასაშენებელი, რაზეც ნებართვა არის გაცემული. ჩვენ ამის შეჩერება ან აკრძალვა არ შეგვეძლო“, - განაცხადა მამუკა სალუქვაძემ.

მიწათსარგებლობის გენერალური გეგმის განახლებაზე კონკურსი მერიის არქიტექტურის სამსახურმა  2015 წლის 19 მაისს გამოაცხადა, რომელშიც „სითი ინსტიტუტი საქართველომ“ გაიმარჯვა. კომპანიამ გეგმის განახლებაზე 18 თვე იმუშავა.

წყარო : commersant.ge